Shillong, Nohprah 08
U Symbud Myntri Rangbah ka Jylla, Bah Sniawbhalang Dhar, u la kren shai ba ym don mano-mano ba lah ban tuklar ïa ka rukom bam jong ki paidbah ka jylla Meghalaya bad ong ba ka Sorkar Jylla ka dang bishar bniah ïa kano-kano ka jingktah kaba lah ban mih na ka jingkhang ban bam doh masi ha ki jaka bam bad ki jaka paidbah bad ha kaba ïadei bad ka jingshalan ïa ki masi sha kane ka Jylla.
Kum ban shu kdew hangne, na ka liang ka Sorkar Assam hapoh ka jingïalam jong u Myntri Rangbah ka Jylla, u Himanta Biswa Sarma, u la pynbna paidbah dang shen ba yn khang noh ïa ka jingbam doh masi ha ki jaka bam bad ki jaka paidbah kiba don ha Assam lem bad ha ki jaka khappud.
Haba kren sha katto-katne ngut ki lad pathai khubor ha ka sngi Saitjaiñ ka 7 tarik u Nohprah, 2024 hadien ba la wai ka prokram rakhe ïa ka jingkynjoh jong ka kynhun ki nongñiah kali Sorkar ïa kaba la tip kum ka Meghalaya Government Driver’s Welfare Association (MGDWA) ïa u mawmer 50 snem ne ka jubilee ksiar ïa kaba la pynlong ha U Soso Tham Auditorium, u Bah Sniawbhalang u la kam ba katei ka jingkhang ïa ka jingbam doh masi ka lah ban ktah ïa ki jaka bam ha ki jaka khappud, hynrei u la pynthikna ba ki bor synshar kin sa shim ïa ki sienjam kiba donkam ban pynthikna ïa ka jingpynpoi jong ki masi da kaba suk sha ka Jylla Meghalaya.
“Ym donkam ban khuslai namar ba ka bor synshar district kan trei katkum ka jingdonkam bad kan pynthikna ïa ka jingleit jingwan jong ki masi sha kane ka jylla”, la ong u Bah Sniawbhalang.
Ha kaba ïadei bad kane kajuh ka bynta, u nongïalam ka BJP uba dei ruh u MLA ka South Shillong Konstitwensi, Bah Sanbor Shullai, u la pynrem jur ïa ka rai jong ka Sorkar Assam ban khang bam doh masi ha ki jaka paidbah bad ong ba kum kane ka rai kam dei ban don namar ha ka riti synshar ka Ri India kam shym la khanglad satia ïa ki paidbah ba kin bam ïa ka doh masi.
Halor kane, na ka liang u Bah Sanbor u la ong ba u la pynkhreh ruh ïa ka shithi ban pynrem ïa katei ka jingleh jong ka Sorkar Assam kaba la ïalam da ka BJP bad ïa katei ka shithi yn phah sha ki nongïalam ka seng hapoh ka Sorkar Pdeng bad ruh sha u Myntri Rangbah ka Assam.
