Nongpoh, Nohprah 09
Katba ki sngi ki por ki la nang jan ban jied ïa ki nongmihkhmat sha ka ïingdorbar thawaiñ jong ka Khasi Hills Autono-mous District Council (KHADC), ki nongïalam ba la mih noh na ka Trinamool Congress (TMC) jong ka Umroi konstitwensi, ki la thaw syndon da ka Umroi Constituency Progressive Forum (UCPF) bad thmu ban pynïeng da u kyrtong shimet ha ka ilekshon MDC ka ban sa long ha u snem 2025.
Kane ka kynhun ka dei kaba la ïadon ryngkat da u Bah George B Lyngdoh, MLA barim ka Umroi konstitwensi lem bad ki nongïalam ba kynthup ïa u Bah Pynskhemlang Sohtun kum u President, Bah MD Syiem kum Working President, Bah Fosterbest Sohiong kum General Secretary bad u Bah Kerbhalang Shylla kum u Treasurer nalor kiwei kiwei ki nongkitkam bad ki dkhot.
Haba kren sha ki lad pathai khubor ha ka Lah Sngi U Blei, u Bah Pynskhemlang Sohtun, President ka UCPF u la pynpaw ba hadien ka jingshah pynrem noh jong u Bah George B Lyngdoh ha ka ilekshon MLA ha u snem 2023, na ka liang ka jong ki kum ki nongïalam da ka jingsngewkhia ki la leit ban kynduh bad twad jingmut ïa ki nongïalam bad nongkyrshan ha kylleng ka konstitwensi ban ïakren bad wad ïa ki daw ba kum ka seng ka shah rem noh. Ka sur kaba bun hi na ki paidbah ka pynpaw ba kim pat pdiang satia ïa ka TMC kaba thymmai.
U la ong ruh ba kumba u MLA barim, Bah George B Lyngdoh u ïaleh katba lah ban trei shitom, ban pynbit pynbiang ïa ki jingdonkam bad ki jingeh ba ki paidbah jong ka konstiwensi ki ïakynduh, na ka liang jong u lem bad kiwei ki nongïalam, kim kwah satia ban pynjah kyrteng ïa ki kam kiba u Bah George u la leh haba ki la rai ban ieh noh ïa ka TMC bad thaw pat ïa kane ka kynhun kaba thymmai kumba la ai jingmut da ki paidbah nongkyrshan ban bteng ïa kane ka kam ban shakri bad kyntiew ïa ka imlang ka sahlang hapoh ka konstitwensi hi baroh kawei.
U la ïathuh ruh ba wat lada ki la shah rem noh ha ka ilekshon MLA ha u snem 2023, hynrei kum ki nongïalam kiba don ïa ka jingkitkhlieh ban kyntiew ïa ka thaiñ hi baroh kawei. Ki don ruh ïa ka bynta kaba khraw ban trei bad shakri na ka bynta ka jingmyntoi jong ki paidbah bad pynpaw ruh ha ka jingpynkhreh na ka bynta ka ilekshon MDC, ka UCPF ka la dep ban thaw ïa ka Election Committee bad pyntip ruh ïa ki paidbah nongkyrshan ba kin ïai shah shipor tad haduh ba la pynbna paidbah ïa u kyrtong ban ïa aireng ha ka taïew ba nyngkong jong u Kyllalyngkot 2025.
Na ka liang jong u Bah George B Lyngdoh u la ïathuh ba hadien ka jingrem ïa ka ilekshon ha u snem 2023, u la iehnoh kam noh na ka TMC kaba u la bat kum u Vice President ha ka jylla bad kum u President ha ka Umroi konstitwensi bad pyntip ruh ba ka jingiehnoh kam ka dei ka jingshim ïa ka jingkitkhlieh halor ka jingrem ïa ka ilekshon.
U Bah George u la pynpaw ruh ïa ka jingsngewnguh sha ki paidbah hapoh ka konstitwensi kiba la kyrshan met bad mynsiem ïa u bad ïa ka kynhun hi baroh kawei ha katei ka ilekshon kaba la dep. Nangta u la ong ruh ba kam don ka jingduh mynsiem lane ka jingbuhkhoh, hynrei u dap da ka jingsngewnguh sha ki paidbah baroh kiba la ai ïa ka jingkyrshan kaba pura met bad mynsiem.
Nalor katta, u la ïathuh ruh ba hadien ka jingsyllok jingmut bad jingai mynsiem jong ki paidbah, la shim ïa ka rai ban pynïeng da u kyrtong shimet lyngba ka UCPF, ka kynhun kaba laitluid. Ka jingthmu hi ka long ban ïai shakri ha ki bynta bapher bapher jong ka konstitwensi bad pyntip ruh ba kawei na kita ka long ban pynïeng da u kyrtong shimet ha kane ka ilekshon MDC ka ban sa long ha u snem 2025.
Na ka liang u Bah George u la buh ruh ka jingkyrpad sha baroh ki paralok, ki baieid bathoiñ bad ki nongkyrshan kiba la ju don ryngkat ba kin sngewbha ban ap ïa ka jingpynbna kyrtong jong ka UCPF bad ai biang sa shisien ïa ka jingkyrshan kaba pura ban ïadon ryngkat bad ka UCPF na ka bynta ban kyntiew ïa ka Umroi konstitwensi ha baroh ki liang.
