Tura, Nohprah 09
Uwei u samla na Kharkutta, North Garo Hills ha ka Sngi U Blei u la shah thombor da ka wait ha uba shipara arkmie bad u, kaba la pynlong ïa u ban mynsaw na ki bynta jong ka khlieh.
La ïathuh ba katei ka jingjia ka la jia ha ka por kumba 9 baje mynmiet, ha kaba uwei u samla uba la tip kyrteng kum u Saljrang G. Momin (24 snem ka rta) na ka shnong Menadoba kaba hap hapoh Kharkutta PS, u la shah thombor ha uba shipara arkmie bad u – Kujar Marak (29 snem ka rta), uba na katei kajuh hi ka shnong.
Kane ka jingjia ka la paw pyrthei hadien ba une u samla u la leit hi dalade sha thanat Kharkutta bad ujor da ka ktien halor kaei kaba la jia. Ha kajuh ka por, la phah eksamin ïa utei u samla sha Kharkutta PHC ha kaba u la shah suh ruh.
Ha kawei ka liang, kawei ka khynnah kynthei kaba dang 16 snem ka rta na Kharkuta ka la jah rngai.
Kane ka khynnah ka la jah rngai naduh ka 7 tarik u Nohprah.
