Jowai, Nohprah 09
Ka Hynñiewtrep Integrated Territorial Organization (HITO) Jowai Circle, ka la dawa ba dei ban pyndap noh kloi ïa baroh 560 tylli ki kam kiba lait ha ki tnat Sorkar bapher bapher hapoh West Jaiñtia Hills District.
Halor kane ka mat ka seng dang shen ka la leit ïakynduh ïa u Deputy Commissioner ka West Jaiñtia Hills District ban ïakren halor kane ka mat kaba la lap katkum ka Right to Information (RTI) Act kaba pyni ba ki don haduh 560 tylli ki post ha ki tnat treikam bapher bapher jong ka Sorkar hapoh ka district ki bym pat shym la pyndap satia, kata kaba kynthup ïa ki kam kiba hap hapoh ka District Selection Committee (DSC) bad ka Meghalaya Public Service Commission (MPSC).
Ha ka dorkhas sha u Deputy Commissioner, ka HITO ka la dawa ba dei ban pyndap noh kloi ïa kine ki kam kiba lait khnang ban pynthikna ïa ki jingtreikam kiba paka jong kine ki tnat treikam. Nalor kata, ka seng ka la kyrpad ruh ïa ka Sorkar Jylla ba kan pynthikna ba ka jingthung kam lyngba ka DSC bad MPSC ka dei ban long ha ka lynti kaba khuid bad suba.
Ka seng ka la kdew ruh halor ka jingdonkam ban don ïa ki eksam bad katkum ka jinglah na ka bynta ki nongïakhun kiba aplai lyngba ka DSC bad MPSC, bad kyntu ruh ban pyndait da ki video camera ha ki kamra thoh eksam na ka bynta ka jingkhuid jingsuba. Nalor kata, ka la ban jur ruh ba ïa ki jubab ba dei ne ‘answer key’ dei ban ai hi ha ka sngi ba pynlong ïa ki eksam khnang ban pynthikna ïa ka jinglong khuid bad suba ha ka jingthung kam thung jam.
Ka HITO ka la ban jur ruh ïa ka jingdonkam ban pynsted halor ka jingpynbeit ïa ki eksam paper khnang ban lah ban pynmih ïa ka risol ha ka por kaba biang bad ka ban pynlah ïa ki kyrtong ba kin tip ïa ka jinglah bad ka jingkiew ka jong ki. Ka seng ka la ai kopi ruh ïa kane ka dorkhas sha u Myntri Rangbah ka Jylla kumjuh sha u MLA ka Jowai bad sha u Chief Secretary ba kin leh ïa kaba donkam.
