Shillong, Nohprah 09
U Nongïalam ka National People’s Party (NPP) uba dei u Chief Executive Member (CEM) ka KHADC, Bah Pynïaid Sing Syiem u la ong ba ki paidbah ki la sngewthuh bha ban jied ha kane ka ilekshon MDC hadien ka ilekshon MLA jong u snem 2023 khamtam ha ki saw tylli konstitwensi kiba ïoh MLA na ka seng thymmai da kaba pynshong nongrim ïa ka jingieid seng.
“Kaei kaba jia ha kine ki konstitwensi, ym don eiei, phai sha ka roi ka par ym don. Kam don jingmut ban shu ïa kyrhuh ban shu ïa byrngem tang ha surok lada phim lah ban treikam hapoh konstitwensi la jong”, la ong u Bah Pynïaid uba dei ruh u MDC na Sohryngkham.
U la ong ba kum ki paidbah donkam ban sngewthuh bha ba ha kane ka ilekshon MDC ka ban sa long ym donkam ban peit ïa ka seng hynrei ban peit ïa ki kyrtong kiba lah ne me ban ai ka jingshakri hapoh ka konstitwensi.
“Ha ka jingshongshit seng da la jop kata ka seng, da wad pat ïa u briew ym lap, sah umdum bad buh jingeh ïa ki paidbah, kin ïa wad shaei ïa uta u briew uta u nongmihkhmat”, u la ong.
U la ong ba ha ri Khasi kam long kum sha ri thor kaba u nongjied u don da ki lak bad jied ïa ka seng hynrei shane tang da ki phew hajar ki nongjied. Dei na kane ka daw ki paidbah ki peit beit ïa ki kyrtong ym ïa ka seng.
U Bah Pynïaid u la ong shuh shuh ba ki paidbah ki dei kiba shemphang kiba stad bad kiba ïohi jngai. Ha ka jingïaid lynti ban ïalap ilekshon ki paidbah kim peit ïa ka seng.
“Lada biang hi u kyrtong phi ïakhun kum u kyrtong ba khlem seng ruh jop hi, katba lada ym dei u kyrtong uba biang lada phi ïakhun na ka seng kaba bha, kaba heh shispah, ba bha ruh, yn ym poi shano-shano”, u la ong.
