Shillong, Nohprah 09
U Nongïalam ka Liang Pyrshah ha Khasi Hills Autonomous District Council (KHADC), Bah Titosstarwell Chyne u la pynpaw ka jingsngew sammut ïa ka jingshah pynbor jong ar ngut ki MDC ka seng Congress ban weng noh na ka Executive Committee ba la ïalam da ka National People’s Party (NPP).
Haba kren ha ka Lah Sngi U Blei, u MDC ka UDP na Sohra u la ong ba ka jingthmu ki MDC ban mih noh na ka EC ka dei tang ka kam thamula namar ba la jan ka ilekshon.
“Ha nga te nga i samrkhie namar mynshwa ki ong ba ka Congress kam long ban ïatreilang bad ka NPP namar ka don ka BJP hynrei ki ïa trei, ynda la jan ka ilekshon pat ki ong ban weng noh te ka long biej ka i long kamkai”, la ong u CEM barim.
U Bah Titos u la ong shuh shuh ba ki Nongïa-lam ka seng Congress ki sngew ba da ka jingdon ki MDC ha ka ka EC ba la ïalam da ka NPP, ka Congress kan ym lah ban leh bha ha ka ilekshon MDC ban sa wan.
“Kane ka pyni ba ka Congress kam dei ka kynhun ba shim khia ban ïatreilang ha ka kynhun synrop na ka bynta ban ïoh synshar. Ki don ha ka bor synshar tang ha ka por ba ki donkam bad haba kim sngew donkam shuh pat ki mih noh”, la ong u Nongïalam ka UDP.
Lah ban pynpaw ba ha kaba sdang ka NPP ka la ïatreilang bad ka UDP ban ïalam ïa ka executive committee ha KHADC kumba la leh hapoh ka Sorkar MDA, katba ka seng Congress ka la shong ha ka Liang Pyrshah. Pynban ha u Jylliew 2023, ka NPP ka la weng noh ïa ka jingkyrshan na ka EC ba la ïalam da ka UDP, bad ïatreilang noh bad ka seng Congress kaba don mynta tang ar ngut ki MDC.
