Shillong, Nohprah 09
Ka tnad Anti-Narcotics Task Force (ANTF) jong ka Jylla ha ka Lah Sngi U Blei ka la lum ïa ka jingïalang hapoh ka jingpynïaid u Myntri Rangbah ka Jylla, u Conrad K. Sangma ban ïakren halor ka saiñdur na bynta ban rat dyngkhong ïa u drok napoh ka Jylla.
Ha kane ka jingïalang, la ïadonlang ruh u Symbud Myntri Rangbah ka Jylla, Bah Prestone Tynsong, Myntri ka tnad ka koit ka khiah, Dr. M. Ampareen Lyngdoh, Myntri ka tnad pule-puthi, Rakkam A. Sangma, Myntri ka tnad Social Welfare, Bah Paul Lyngdoh bad DGP, Kong Idashisha Nongrang nalor kiwei-kiwei ki heh ophisar ka Sorkar Jylla.
Ka jingïalang ka la ïakren sani bha halor ki lai tylli rukom treikam da ka tnad ba khmih ïa ka aiñ, ka tnad pulit, ka jingpynduna ïa ka jingma da ka tnad ka koit ka khiah bad ka jingshngaiñ ha ka imlang-sahlang da ka tnad Social Welfare.
Ha kajuh ka por, ka jingïalang ka la ïakren ruh halor ki jingkylla kiba ktah ha ka liang ka jingpynwandur, jingtreikam bad ka rukom treikam ka ANTF bad ïakren ruh halor ka buit treikam kaba la tyrwa bad ka jingïarap, lem bad ka jingkyrshan kaba donkam na ki tnad treikam bapher-bapher kum ka tnad aiñ, ka koit ka khiah, pule-puthi bad Social Welfare.
Haba kren halor kane ka bynta, u Myntri Rangbah, Conrad K. Sangma, u la ban jur halor ka jingdonkam ban shim ïa ka sienjam kaba long kyllum lang bad ong ba ka ANTF ka donkam ruh ban shong lang bad ki tnad treikam ba dei khmih bad ïasnohktilang ha ka ban pyntreikam ïa ka buit treikam ha la ki jong ki jong ki kylla bad ban don ïa ka saiñdur kaba la pynkhreh na bynta ka por kaba lyngkot, kaba pdeng bad kaba jlan.
“Ka jingtreikam jong ka ANTF ka long kaba ïar, te kumta kan long kaba biang ban pynleit jingmut nyngkong halor ki soh kiba noh bad ban ïaid shakhmat bad ka buit treikam kum ki ‘Pilot Project’ ha katto-katne ki jaka kiba ka jingkynrei u drok hapoh ka Jylla ka kham jur,” u la ong.
U la bynrap ba ka sienjam ka donkam ban kynthup lang ïa ka jingbym pdiang satia ne ‘Zero Tolerance’ da kaba buh jingmut ïa ka bynta jong ka jinglongbriew haba ïadei bad ka jingkynrei u drok hapoh ka Jylla.
“Wat la ka dei ban don ka jingbym pdiang satia da ka tnad ba khmih ïa ka aiñ halor ka jingpynpoi bad jingsam ïa u drok, hynrei ka bynta ba ïadei bad ka jinglong briew na liang jong ki nongpyndonkam, ka jingpynbha ïa ki, ka koit ka khiah bad ka jingkynthup lang hapoh imlang-sahlang, ka bynta ba kongsan jong ka tnad ka koit ka khiah bad ka tnad Social Welfare ka sdang ban treikam,” u la ong.
Shuh shuh u Myntri Rangbah u la ban jur halor ka bynta jong ka tnad pule-puthi ha ka ban pynsngewthuh bad pynsaphriang jingtip pyrshah ïa ka jingkyrni ha ki kam dih drok.
Nalor kane, ka jingïalang ka la ïakren ruh halor ka jingpeit bniah, jingsumar bad ‘Rehabilitation Center’ lem bad ki buit treikam ban bthat ïa u kynri pynpoi drok sha ka Jylla.
