Shillong, Nohprah 09
Ka Kynhun Myntri jong ka Sorkar Jylla ka la ai jingmynjur ïa ka jingtyrwa ban pynlong ïa ka ilekshon sha Ïingdorbar Khasi Hills Autonomous District Council (KHADC) bad Jaiñtia Hills Autonomous District Council (JHADC) bad yn sa pynbna paidbah ynda la ïoh ka jingmynjur na u Lat ka Jylla.
Haba kren sha ki lad pathai khubor hadien ba la wai ka jingïalang ka Kynhun Myntri ha ka Lah Sngi U Blei, u Myntri Rang bah u Conrad K Sangma u la ïathuh ba ka Kynhun Myntri ka la mynjur ïa baroh ki tarik ban pynlong ilekshon hynrei hap ban ap sa tang ka jingmynjur jong u Lat
“Ngin ap mynta ïa ka jingmynjur jong u Lat bad hadien kata, yn sa pynbna ïa ki sngi bad tarik ban pynlong ïa ka ilekshon,” la ong u Myntri Rangbah.
Ka samoi treikam jong ka KHADC bad JHADC kan kut ha ka 5 tarik Lber 2025 bad ïa ka ilekshon dei ban pynlong shwa jong kane. Ka jingthep ‘vote’ ka lah ban long ha ka 28 tarik u Rymphang 2025 bad ka jingñiew ‘vote’ kan long ha ka 3 tarik Lber, 2025.
