Shillong, Nohprah 09
Ka jingïalang jong ka Kynhun Myntri ka Sorkar Jylla ka la ai jingmynjur ïa ka plan ba kyrpang ka ban treikam tang shisien treikam ban ai skhim khang khyrdep ïa ka karkhana kum shibynta na ki sienjam ban khang dam noh ïa ka Mawmluh Cherra Cement Limited (MCCL).
Ïa kane la pyntip da u Myntri Rangbah Conrad K Sangma haba kren sha ki lad pathai khubor hadien ba la wai ka jingïalang ka Kynhun Myntri kaba la long ha ka Lah Sngi U Blei bad ha kaba u la ong, “Ngi la dep pynbeit khatduh bad mynjur ïa ka plan kyrpang ba shisien treikam, na ka bynta ban ai skhim ha ka ban khang khyrdep noh ïa ka MCCL”.
Haba pynpaw ba ka Sorkar ka la pynkhreh shaid shaid ïa ki kam ban khang dam noh ïa ka MCCL, u la ong “Namar kata, ngi la wanrah ïa kane ka skhim kyrpang ba ïa ai khublei khatduh bad ki nongtrei lane ka VRS”.
Kat kum ka jingong jong u, ïa kane ka skhim la mynjur hadien ka jingïasyllok kaba sani bha bad ki nongtrei ka MCCL.
“Mynta, ka MCCL kan sa tyrwa khatduh ïa ka skhim bad kan sa ïasyllok bad ki seng jong ki nongtrei lem bad kiwei kiwei bad yn sa ïasoi ïa ki kot ki sla ban lah pyndep ïa ka kam. Hadien kane, yn sa ïaid pat ka jingkhang dam noh ïa kane ka karkhana” ong u Myntri Rangbah.
U la pyntip ba kane ka song ba la mynjur mynta ka sngi kan khmih ruh ïa ki jingsiew ba dang sah baroh.
Haba kylli, u Myntri Rangbah u la ong “Ngam lah ban ai sha phi ïa ki jingtip ba bun hynrei ha ryngkat ki nongtrei bad kiwei kiwei ki jingsiew lada kheiñ lang kan kot ïa ka T.100 klur”. U la ïathuh ba ki nongtrei ka MCCL ki don palat ïa ka 250 ngut.
Nalor kane, u Myntri Rangbah u la pyntip ba ka Sorkar kan sa die noh ïa ki jingdon-jingem baroh jong ka MCCL.
Haba kylli halor ka jingpulom ka jingtyrwa pyntreikam da ka Joint Venture ban pynim ïa ka MCCL, u Myntri Rangbah u la ong ba ki lai tylli ki kompani kim shym la lah ban pynbiang ïa ki jingdonkam bad ki kyndon ba la buh da ka Sorkar Jylla.
“Ngi la ïaid bad khot da ka EoI ha kaba ki la don lai tylli ki kompani kiba la wan. Kawei ka kompani kam shym la lah ban pynbiang ïa ki kyndon ba la buh, kawei pat ka la wan hynrei ka la shu jah noh bad kawei pat kam shym la lah ban pynbiang ïa ki jingdonkam ban pynïaid shakhmat ïa ka kam” u la ong.
