Shillong, Nohprah 09
U Chief Executive Member (CEM) ka Khasi Hills Autonomous District Council (KHADC), Bah Pynïaid Sing Syiem u la ong ba ha ka por ba trei ïa ki kam na ka bynta ki paidbah ym dei ban wanrah ïa ka seng kaba ki don.
U la ong ba kum ki nongmihkhmat ki khlem mih na ka bynta kano-kano ka seng ba ki don hynrei ki mihkhmat na ka bynta ki paidbah, namar bad ka seng lah ban ïa dei tang ha ka por ilekshon ban ïoh ïa ka shap hynrei baroh san snem ka jing-treikam ka dei na ka bynta u paidbah.
Kane ka jingkren u Bah Pynïaid ka long haba kylli halor ka jingshah pynbor ki MDC ka seng Congress ban weng noh ka jingïatreilang na ka Executive Committee ba la ïalam da ka NPP.
“Ngi ïohi ba ka don ka jingshah pynbor ki MDC ka seng Congress kiba ïatreilang bad ngi, ïa ka kam jong kiwei ki seng saiñpyrthei ngam don ei-ei ban ong, hynrei nga shu pynpaw ka jingsngewkhia halor kane ka khubor namar ha ka jingïatreilang ngi la leh shibun ki kam na ka bynta ka jingmyntoi jong u paidbah bad ka synshar-khadar”, la ong u CEM.
U la ong ba ka jingïadei jong u MLA/MDC bad ki seng saiñpyrthei ka dei tang ha ka por ilekshon namar ka long tang ban ithuh ïa ka shap khnang ba ki paidbah kin ithuh kumno bad ïano ban jied.
“Ïa ka rai ba ki MDC ka Congress kin sa shim ruh ngam don ei-ei ban ong lane ban pynbor ïa ki ban neh”, u la ong.
U Bah Pynïaid u la ong ruh ba ym dei ban wanrah ïa ka seng ha ka jingtreikam paidbah, da kaba pynpaw ruh ba dei ban buh shwa ïa ka jingdonkam bad ka jingeh ki paidbah hakhmat, ka kam seng pat kan wan hadien.
U Bah Pynïaid u la ong shuh shuh ba ka jingïatreikam baroh san snem ka dei beit bad ki paidbah, ym bad ka seng.
“Ngi mihkhmat na ka bynta ki paidbah, ngim dei ba ngi mihkhmat na ka bynta kano-kano ka seng. Kum ki nongmihkhmat ngi dei ban sngewthuh ba ka jingïadei jong ngi bad ka seng ka dei tang ha ka por ilekshon”, la ong u CEM.
