Shillong, Nohprah 09
Ka Hynñiewtrep National Youth Front (HNYF) East Khasi Hills District hapoh ka jingïalam jong u President, u Bah Steve R. Khyriem ha ka step jong ka 9 tarik u Nohprah, 2024, ha ka por kumba 8 shiteng eiei, ki la ïoh ban bat ïa kawei ka ‘Pickup’ kaba kit ïa ki nongtrei bar jylla kiba wan na ka Jylla Assam bad ki bym don satia ïa kino-kino ki kot ki sla kiba biang na ka bynta ban leit bylla sha Mairang kaba hap hapoh ka Eastern West Khasi Hills District.
Ha ka jingïoh bat jong ka seng ïa katei ka kali, la ïoh jingtip ba kane ka kali ka dei kaba thmu ban leit buh ïa kitei ki bar jylla ban leit trei bylla ha kawei ka ïingmala kaba dang tei kaba don ha Mairang.
Na ka liang ka seng haba pyrshang ban kylli na kitei ki bar jylla ïa ka jingïoh wan rung laitlan jong ki shapoh ka Jylla khlem kino-kino ki kot ki sla kiba biang, kitei ki bar jylla ki la ïathuh ba ki la hap ban shu siew tang kumba T. 1,000 hapoh ka khyrdop talasi ïa ki briew ne ka ‘Infiltration Check Gate’.
Na ka liang ka seng ha kane ka jingïohbat ïa kine ki bar jylla, ka la phah leit phai noh mardor na ka jaka ba ki wan bad pynrem jur ruh halor kane ka jingleh jong ki briew kiba ap ha katei ka khyrdop na ka bynta ban talasi ïa ki briew da kaba ban jur ruh ba kum ka Sorkar ka dei ban tehlakam ïa kum kine ki jingwan rung beaiñ jong ki bar jylla shapoh ka Jylla Meghalaya.
