Jowai, Nohprah 8
Ki paid riewngeit ka Balang Catholic ki la wan ïashim bynta shitrhem ha ka Proseshon Iukharis ba la pynlong shisien shisnem da ka Cathedral Parish Jowai ha ka Sngi U Blei ha madan Marian Hill, Jowai.
Shwa ka jingïaid Proseshon, la pynlong ïa ka jingknia Mass Iukharis Bakhuid kaba la pyndep da u Most. Rev. Ferdi-nand Dkhar D.D, Bishop ka Jowai Dioceses ha ryngkat ka jingsynran lang ki Lyngdoh Sohblei napoh ka Diocese bad nabar.
Ha kane ka sngi la don haduh 80 ngut ki khynnah rit shynrang bad khynthei kiba pdiang ïa ka Kommunion Bakhuid ha ka sien banyngkong bad 50 ngut ki samla shynrang bad kynthei kiba ïoh pdiang ïa ka Sakrament Jingpynskhem.
U Bishop Ferdinand Dkhar haba sam ïa ka khubor na ka ktien U Blei, u la ong kane ka dei ka Aïom jingpynkhreh (Advent) na ka bynta ka jingkynmaw ïa ka jingwan long briew jong u Jisu u khun jong u Blei sha kane ka pyrthei ban pynim ïa ki khun bynriew.
Lyngba kane ka khubor u Bishop u la ïa wer ïa iwei-pa-iwei riewngeit ban long kiba la pynkhreh ïalade ban pdiang ïa u Jisu, ym ban pdiang da ka jingkmen kaba tang shipor, hynrei da ka jingkmen kaba neh junom.
Ha ka nohphai sngi, ki riewngeit ki la shim bynta ha ka jingïaid proseshon ryngkat ki jingrwai jingduwai ban ïaroh ïa U Blei ha baroh shilynter ka jingïaid proseshon kaba sdang na madan Marian Hill, Iawmusiang, Mission Compound, Iongpiah, Dulong, Tpep Pale bad wan phai biang sha madan Marian Hill.
Ha shwa ban pynwai, la ïoh ka jingkyrkhu Sakrament bakhuid tam ka Duwan na u Bishop Ferdinand Dkhar bad la ïoh ruh ïa ka jingkren shaphang ka jingkhraw jong ka Iukharist bakhuid.
