Shillong, Nohprah 09
Ka North East Students Organization (NESO) ka la pynbna ban pynlong da ka jingwah lama ïong bad banner ïong ha baroh 7 tylli ki Jylla ka thaiñ Shatei Lam Mihngi ha ka 11 tarik Nohphrah, kum ka dak ban pynpaw jingpyrshah ïa ka Citizenship (Amendment) Act, 2019.
Ka Citizenship (Amendment) Act, 2019 ka dei kaba ailad ban ithuh Nongshong shnong ïa ki poiwir ki bym dei ki Muslim ba wan phet na Bangladesh, Pakistan bad Afghanistan.
Ha ka kyrwoh ba la pynmih ha ka Lah Sngi U Blei, ka NESO ka la ong “Ngi kwah ban pynkynmaw ïa ki paidbah jong baroh kawei ka thaiñ Shatei Lam Mihngi ba ha ka 11 tarik Nohprah 2019, wat hapdeng ki jingpyrshah ba khlem sangeh jong ki paid riewlum ka thaiñ pyrshah ïa ka Citizenship (Amendment) Bill 2019, ka Sorkar India kam shym la pynsangap bad khatduh lyngba ka Rajya Sabha ka la mynjur ïa ka aiñ ïakjakor ba la tip kum ka Citizenship (Amendment) Act 2019. Ka NESO ka la pynbna ba ka 11 tarik Nohprah kan ïai sah ha ka jingkynmaw kum ka sngi ba dum ngit ïa ka thaiñ Shatei Lam Mihngi baroh kawei”.
“Kumta, kum ka jingpynbteng ïa ka jingkynmaw ïa kane ka sngi ba dum ngit, ka NESO ka la rai ba kan don ka jingpynher lama ïong bad wah banner ïong ha baroh ki jaka ba kongsan jong hynñiew tylli ki Jylla ha ka 11 tarik Nohprah 2024. Kane ka jingkynmaw ka long ban phah ïa ka khubor sha ka Sorkar India ba ngi pyrshah ïa kane ka Citizenship (Amendment) Act, 2019 bad ruh ha kajuh ka por ban pynkynmaw ïa ki paidbah jong ngi bad ïa kiba hadien jong ngi sa ïa kawei pat ka jingleh bymhok jong ka Sorkar India pyrshah ïa ki paid riewlum ka thaiñ Shatei Lam Mihngi” ka la ong.
Ha kajuh ka por, ka NESO ka la khot ïa baroh ki paidbah ka thaiñ ba kin kyrshan ïa kane ka jingkynmaw ïa ka sngi ba dum ngit bad ha kajuh ka por ban ïai ïaleh na ka bynta ka daw ba shonghok kaba long ka hok ba la ai da U Blei.
