Shillong, Nohprah 09
Ka Voice of the People Party (VPP) ka la kren shai ba ka lah ban weng ne pynduh noh ïa ka jinglong kyrtong jong kino-kino ki kyrtong na bynta ka ilekshon MDC ban wan lada ki ïaid lait na ki nongrim ne jingbthah jong ka seng.
“Ka State Executive Committee jong ka VPP ha ka jingïalang kaba la long ha ka 9 tarik Nohprah, 2024 ka la rai ba ka don ïa ka hok ban khmih bniah bad/lane ban weng noh ïa ka jinglong kyrtong jong uno-uno ne kano-kano ka kyrtong na bynta ka ilekshon sha ka Khasi Hills Autonomous District Council (KHADC) bad Jaiñtia Hills Autonomous District Council (JHADC) lada ha kano-kano ka khep la shem ba uta ne kata ka kyrtong kim long kiba dei hok ban shah jied kum u/ka kyrtong ba pura jong ka seng, ne kita ki kyrtong ki ïaid lait na ki nongrim/jingbthah jong ka seng,” ong u nongaiktien ka seng, Dr. Batskhem Myrboh ha ka kyrwoh khubor.
Na ka liang une u nongïalam u la ong ruh ba ka State Executive Committee kumba la ai jingmut da ka State Election Commission ka lah ban sei kyrtong thymmai na ka bynta kano-kano ka konstitwensi.
Dang shen, ka VPP ka la sei kyrtong ban pynïakhun ïa ka ilekshon sha baroh 29 tylli ki konstitwensi jong ka KHADC bad JHADC.
Ïa ka kyrteng jong ki kyrtong kiba dang sah na ki konstitwensi ki bym pat pynbna, ka VPP ka la pynbna ha ka 2 tarik Nohprah na ka bynta ban ïakhun ïa ka ilekshon MDC sha ka ïingdorbar thawaiñ, kata sa 2 ngut sha ka KHADC bad 5 ngut na ka bynta ka JHADC.
Lah ban pynkynmaw ba ha ka 13 tarik Naiwieng, ka VPP ka la dep ban pynbna paidbah ïa 27 ngut ki kyrtong ban ïakhun ïa ka ilekshon sha ka KHADC bad 24 ngut na ka bynta ka JHADC.
