Shillong, Nohprah 10
Ka shnong Mawlai Nonglum ka la pynbeit ban don ka jingpynkhuid shnong ha ka 16 tarik mynta u bnai. Ka jingpynkhuid shnong kan sdang naduh ka 8 baje mynstep.
Kumta la kyntu ïa baroh ki kali kiba ïaid na ka Archbishop Dominic Jala Road (Long Round Road), Mawlai Nonglum ba kin ñiah suki bad don akor khnang ban lait na kino-kino ki jingjia sngewsih.
Ha kajuh ka por la kyntu ruh ïa baroh ki kali kit ñiut bad kumjuh ruh ïa ki kali kit skum kiba ïaid man la ka sngi lyngba jong ka Archbishop Dominic Jala Road ba kin da tap bha ïa ki kali khnang ba ki ñiut ki ñier bad skum kin ym hap ha ki surok.
La bthah ruh ïa ki trai jaka kiba don ïing, jaka hapoh u pud u sam jong ka Mawlai Nonglum ba kin wan ban pynkhuid ïa la ki jaka ha katei ka sngi bad kumjuh ruh ban ïakynduh ïa ki Rangbah Dong jong kato ka Dong.
Ha kawei pat ka khubor, ka Dorbar Dong Demseiñïong Laitumkhrah, kan pynlong ïa ka jingpynkhuid Dong kaba shisien shi snem ha ka 16 tarik mynta u bnai naduh ka por 8 baje mynstep. Ha kane ka sngi, baroh ki dukan bad ki karkhana khaïi bapher-bapher kiba hap hapoh u pud u sam jong ka Dorbar Dong Demseiñïong kin khang lut haduh ka por 1 baje mynsngi.
Ka Dorbar ka la kyntu ruh ïa ki kali paidbah ba kin kiar ban ïaid na kane ka surok ha kane ka sngi lait noh tang lada don ki kam kyrkieh namar ka jingkhim ka surok khnang ba ka jingpynkhuid dong kan ïaid beit ïaid ryntih.
