Shillong, Nohprah, 10
Ka seng ki nongñiah kali Sorkar ba la tip kum ka Meghalaya Government Driver’s Welfare Association (MGDWA) ha ka Sngi Saitjaiñ jong ka taïew ba la dep ka la rakhe ïa ka jingdap 50 snem ha ka jingïaid lynti ban lum lang ïa ki nongñiah kali na ki tnat treikam bapher bapher ka Sorkar Jylla ban ïadonlang hapoh kawei ka shatri ka ban peit na ka bynta ka bha ka miat ka jong ki.
Ha ka jingrakhe ïa kane ka lyngkhuh snem kaba la long ha Soso Tham Auditorium, Shillong la sakhi lang da u Symbud Myntri Rangbah ka Jylla uba khmih ïa ka tnat Transport u Bah Sniawbhalang Dhar uba la long kum u Kongsan, ka Deputy Commissioner jong ka East Khasi Hills District ka Kong RM Kurbah, u President jong ka Association u Bah C Syiemlieh, u General Secretary Bah P Nongkynrih bad ki nongñiah kali na baroh kawei ka jylla.
Katkum ka jingïathuh jong u General Secretary barim ka Association, Bah Marcel Lamare, u la sdang ïa kane ka seng jong ki nongñiah ha ki tnat treikam ka Sorkar Jylla ha u snem 1974 bad ha u snem 2001 kane ka kynhun ka la rakhe ïa ka Jubili Rupa.
“Mynshwa kiba bun na ki nongñiah kali kim pat sngewthuh ïa ka jingdonkam ban don ïa ka kynhun hynrei ngi la leit sha kylleng ki tnat treikam ka Sorkar bad sha ki bynta bapher bapher bad kumjuh ngi la leit sha rilum Garo ban pynsngewthuh bad ban lum ban lang ïa baroh ki nongñiah kali,” ong u Bah Lamare.
U Bah Lamare uba la trei la 35 snem bad shongthait ha u snem 2020, u la ïathuh ruh ba ka MGDWA ka la pynïasoh ruh bad ka All India States Driver Federation (AISDF) ha kaba ki don ka seng ki ju leit sha Delhi ban ïashim bynta ha ki jingïalang ba la khot pynlong da ka Federation.
Haba kylli, u Bah Lamare u la ïathuh, “Da ka jingdon jong ka seng, ïa ki nongñiah kali kiba ïaid kynriang bad kim bym kit khiah ïa ka kam, ngi ju ïarap ban sneng bad kraw bad ngi pynsngewthuh ba dei ban trei hok ïa ka kam bad haba ngi trei hok, ki ophisar bad ki Myntri Sorkar ruh ki ieid bad ki sngew ïa ngi kum la ki jong ki bahaïing hasem.”
Shuh shuh u la ïathuh ruh ba kum ka kynhun ka ju ai jingïarap katba lah ei sha ki para briew kiba duk ba shitom da kaba ai jingïarap pisa lyngba ka Christmas Makeover bad ha ka por ba la wan lynshop ka jingpang khlam Covid-19, ka seng ka ju ïarap ïa ki para briew kiba donkam ïa ki jingïarap.
Ïa mynta ki don haduh 700 ngut ki nongñiah kali ba la pynrung kyrteng ïalade ban long kum ki dkhot hapoh ka MGDWA.
