Shillong, Nohprah 10
Da ka jingthmu ban pynkiew ïa ka jingtip shaphang ka jingdonkam jong ka khyndew kaba koit-khiah bad ka jingdonkam ban pynïaid ïa ka na ka bynta ka lawei ba lah ban pynneh pynsah, ka ophis u Research Officer, District and Local Research Station and Laboratories, Shillong ha ka 5 tarik Nohprah 2024 ka la rakhe ïa ka sngi kyrpang jong ka khyndew (World Soil Day) 2024.
La pynitynnad bad pynshongkun ïa kane ka jingrakhe da kaba don lang ka kongsan Kong JC Lyngdoh, Director jong ka tnat ka rep ka riang (Agriculture); u symbud kongsan B Ch Hajong, Director jong ka tnat ka rep ka riang (R&T); bad ka jingdon bynta lang jong kiba bun ki ophisar kiba trei sha madan, ki nongtrei jong ka ophis bad shispah ngut ki nongrep jong ka jylla kiba la mihkhmat na ki jaka bapher bapher jong ka East Khasi Hills, West Khasi Hills, Eastern West Khasi Hills, South West Khasi Hills bad Ri-Bhoi distrik.
La phiah ïa ka prokram ha ki artylli ki bynta kata ka jingïalang banyngkong bad ka jingïalang teknikal ha kaba la pynïoh ïa shibun ki jingïamir jingmut lyngba ki ophisar ba la jied kyrpang na ka tnat jong ka rep ka riang ban ai ka jinghikai halor ki bynta bapher bapher kum ka kard jingkoit jingkhiah jong ka khyndew (Soil Health Card) kynthup lang ïa ki jingai jingmut katkum ka kaiphod khyndew bad ki jingpynbeit pynbiang, ka jingtest ïa ka khyndew bad ka jingdonkam ban thew (test), ka jingpynbiang ïa ka koit ka khiah jong ka khyndew, ka jingpyndonkam ïa ki phngit jingim (bio inputs) ha ka rep ka riang bad kiwei kiwei de ki kam ba la bynshet ha ka ophis ba la kdew haneng.
Kane ka jingpyrshang ha kum kane ka sngi ba shongkhia ka wanrah ïa ka jingsngewhun kaba khraw bad ka jingsngewbha ïa ki paid nongsngap ba la mang ban don bynta, kata ki nongrep. La pynkordor shuh shuh da ka jingsam ïa ki Soil Health Card bad kumjuh ruh ka jingpyllait ïa ki kot lyngkdop ha ka ktien Khasi ban pynmlien bad pynshlur ïa u nongrep ban phah peit ïa ka khyndew na ka por sha ka por.
