Shillong, Nohprah 10
Haduh 53,627 ki longïing hapoh ka Jylla Meghalaya ki la la ïoh ïa ki paiñkhana bad haduh 1,108 tylli ki paiñkhana paidbah ka Jylla ka la ïoh lyngba ka Swach Bharat Mission Gramin (SBMG).
Haba pyntip ïa kane, u Myntri ba khmih ïa ka tnat Public Health Engineering (PHE), u Marcuise N Marak ha ka Sngi Ba-ar u la ong ba ka 10 tarik u Nohprah mynta u 2024 ka dei ka sngi ba la pynkut syndon ïa kane ka skhim.
“Ngi la pyndep kumba 78.5 persen ka jingtei ïa ki paiñkhana ha ki longïing. Ngi la pynthikna ruh ba kine ki paiñkhana ki dei ban treikam, bad na ka liang jong nga ruh nga la shong bishar bniah ha ka jingïalang bad nga la bthah ïa ki ophisar ban pyntreikam ïa ki,” la ong u Marcuise Marak.
Haba kdew ba ka thong jong kane ka mission kan long lang bad ka thong ban wanrah ïa ka jaka leit bar kaba khuid-suba, u Myntri u la ong ba ka Jylla ka la lah ban pynïoh haduh 53,627 ki jaka leit bar ha ki longïing bad haduh 1108 tylli ki jaka leit bar ha ki shnong ki thaw ha baroh kawei ka Jylla.
U Marcuise u la pyntip ruh ba haduh mynta ki don kumba 1,48,102 lak ki aplikeshon na ki longïing jaka leit bar, bad la mang pisa haduh T.87,000.
Haba kren halor ka jinglait na ka jingleit bar pathar, u Myntri u la ong ba ka Jylla Meghalaya ka la kot sha palat 83 persen kiba lait na ka jingleit bar pathar, bad bynrap ba kane ka long kaba bha na ka bynta ka Jylla.
Ha kajuh ka por u Myntri u la ïathuh ruh ba ka jingmang pisa na ka bynta ban shna ïa ki jaka leit bar ha man la ki longïing ka long T.12,000.
Haba pynpaw pat ïa ka jingeh ban pyntreikam ïa kane ka mission, u Marcuise Marak u la ong ba ka jingeh kaba ïakynduh ka dei ban ïoh ïa ka jaka ban tei ïa ki jaka leit bar.
U Marcuise u la kyntu jur ïa ki nongïalam shnong bad ki paidbah ban ai ka jingïatreilang bad ka Sorkar ban pynlong ïa ka Jylla kaba lait na ka jingleit bar pathar.
