Shillong, Nohprah 10
Ki seng saiñpyrthei riewlum ba don lang hapoh ka Regional Democratic Alliance (RDA), ka United Democratic Party (UDP) bad ka Hill State People’s Democratic Party (HSPDP) kim pat lah ban shim rai ha kaba ïadei bad ka jingïatreilang na ka bynta ka ilekshon MDC ka ban sa long.
U Working President ka UDP, Bah Titosstarwell Chyne u la ong ba na ka liang ki ar seng ki la rai ban ïakynduh biang ha ka 11 tarik u Nohprah ban shim ïa ka rai kaba khatduh kumno ban ïaid shakhmat ha kaba ïadei bad ka ilekshon MDC ka ban wan.
“Ngin sa shim ïa ka rai la ngin ïaid lang kum ka kynhun lane ngin don ka jingïapyrkhat da kaba ïasngewthuh jingmut lang ha ka rukom pynïeng ïa ki kyrtong ha ki konstitwensi bapher bapher”, u la ong.
U la ong ba ka RDA kan ïakhun beit ha 29 tylli ki konstitwensi da ka jingïasngewthuh bad ka HSPDP ha katto-katne konstitwensi.
U Bah Titos u la ong ba ka RDA ka don ïa ka lad kaba biang bha ha kane ka ilekshon MDC ka ban wan bad kam ba ka UDP ryngkat bad ka HSPDP kin ïalam ïa ka Executive Committee ha ki District Council.
“Ngi don ha ka kyrdan kaba biang bha na ka bynta ka ilekshon ban wan”, u la ong.
U Nongïalam ka UDP u la ong ba ym lah ban ïanujor ïa ka ilekshon MD bad ka ilekshon MP Lok Sabha.
“Ka ïapher bha bad phin sa ïohi ïa ka result kaba pher ha ka ilekshon MDC ka ban wan”, u la ong.
“Ha District Council ngim don bynta lang ha ka kynhun synshar, ngi don ha ka liang pyrshah, kumta ngin ïakhun ïa kane ka ilekshon kum ka Liang Pyrshah”, la ong u CEM barim.
U Nongïalam ka UDP u la pynpaw ruh ba kan ym don satia kano kano ka seng saiñpyrthei ka ban jop bun ngut ki kyrtong haduh ban da ïoh ïalam syndon ïa ka EC.
U Bah Titos la ong ruh ba ha kane ka ilekshon yn sa ïohi ïa ka jingpher ha ka jinglong jingman namar ka ilekshon MDC ka shong eh ha ki kyrtong, wat la ka seng ruh ka don ïa ka bynta kaba khraw ban leh.
