Shillong, Nohprah 10
Ka Meghalaya Medical Recruitment Service Board (MMRSB) ka la pynmih ïa ka risol bathymmai halor ka jingthung kam ïa 164 ngut ki nos hadien ka jingtuklar jong ka Khasi Students’ Union (KSU) namar kiba bun ki kynrum-kynram haba ïadei bad kane ka bynta.
“Hadien ba tuklar ka seng ïa ka jingthung kam jong 164 tylli ki kam jong ki ‘Staff Nurse’ lyngba ka MMRSB ka bym shym long kaba beit, ïaid ryntih, ka MMRSB ka la pynduh noh ïa ka risol kaba rim bad pynmih da ka bathymmai,” ong u Asst. General Secretary-cum-Chairman Employment Monitoring Cell, KSU, samla Reuben Najiar ha ka kyrwoh khubor.
U la pynkynmaw ruh ba kane ka long hadien ka jingïakynduh jong ka seng ryngkat ki nongmihkhmat na liang ki nos ïa ka Myntri ka tnad ka koit ka khiah, Dr. M. Ampareen Lyngdoh, ha ka jingdon lang kiwei ki heh Sorkar bad ki dkhot ka MMRSB ha ka 30 tarik u Nailur mynta u snem.
Na ka liang ka seng, ka la dawa ban pynduh noh ïa ka risol barim namar ba bun ki kynrum-kynram, ha kajuh ka por ba don ruh ki jingkylli kiba bakla, ka jingbym sngewhun ïa ka ‘mark’ ba ki nongïaleh eksamin ki ïoh bad kiwei-kiwei.
Kumta, ban pynbeit ïa kine kiei-kiei baroh, la thaw ïa ka ‘Grievance Cell’ ka ban ailad ïa baroh ki nongthoh eksamin ba kin lah ban ujor halor ki jingkylli ba bakla bad kiwei ki bynta bym shym la ïaid beit bad ha kajuh ka por ba kin ïoh peit ïa ka sla thoh jubab jong ki la ki dei ne em katkum ka ‘mark’ ba ki ïoh.
U samla Najiar u la ïathuh ruh ba ka Grievance Cell’ ka la ïoh pdiang haduh 101 tylli ki jingujor na ka liang ki nongthoh eksamin bad la lap ruh ba don bun tylli ki jingkylli kiba bakla.
Ha kajuh ka por, u la ong ba hadien ka jingshem jong ka ‘Grievance Cell’, ka la pynbeit ïa kine kiei-kiei baroh bad pynmih ïa ka risol bathymmai ha ka 9 tarik u Nohprah, 2024.
Na ka liang ka Seng ka kyntu ïa ka Sorkar bad ki bor pynïaid jong ki eksamin bapher-bapher ba kim dei ban ïalehkai bad ka jingim jong ki samla wad kam bad haba ki pyllait ïa kano-kano ka kam, ki dei ban khmih bniah ba ki eksamin ki dei ban ïaid beit khlem kano-kano ka jingpynwit ne kynrum-kynram kumba ïai jia man ka por.
“Ka seng kan ïeng rasong ban pyntikna ba ka thungkam-thungjam ha ka Jylla ka dei ban long kaba khuid khlem da noh shiliang shano-shano bad kiba dei hok ban ïoh ïa ka kam kin ïoh kita,” ong utei u nongïalam.
