Nongstoiñ, Nohprah 10
U District Magistrate ka West Khasi Hill District, Bah Garod LSN Dykes, IAS, u la pyntreikam da ka kyndon 163 BNSS 2023 kaba khang bad mana pyrshah ïa kino kino ki briew lane ki kynhun kiba ju mlien ban kem bad tong dohkha ha ki bynta jong ka wah Khri bad wah Rambrai.
Ha ka kyrwoh khubor u District Magistrate u la ong, katei ka kyndon aiñ nalor ka jingkhang ban kem bad tong dohkha, la khang ruh ban pynjaboh bad pynjot ïa ki wah, ki dohkha bad ki kynja ba im hapoh um ha ki bynta jong ka wah Khri bad wah Rambrai jong ka West Khasi Hills District da kaba pyndonkam da ki kynja dawai ba long bih, ban pynbthei bad ban pyndonkam da ki kynja circuit lyngba ki battery bad generator.
Shuh shuh u la ong ruh ba ïa kane ka jingujor la ïoh jingtip na ki nongïalam bad nongshong shnong jong ka shnong Kyrshai, kumta na ka liang u District Magistrate u la ong ba kino-kino kiba ïaleh pyrshah yn pynsaja katkum ki kyndon jong ka aiñ.
U District Magistrate u la ong ruh ba kane ka hukum kan treikam noh mardor tad haduh ynda pynbna da kumwei pat.
