
Shillong, Nohprah 10
U Nongïalam ka NPP uba dei ruh u Myntri hapoh ka Sorkar Jylla, u Marcuise N Marak u la ong ba ha ka ri India kaba dei ka ri synshar paidbah ka don ka hok ban bam laitluid katba mon, namar ka rukom bam ka dei ka hok jong iwei-pa-iwei briew.
Kane ka jingkren u Myntri ka long ban pynpaw ka jingbym sngew ïahap ïa ka rai jong ka Sorkar ba la ïalam da ka BJP ha Assam, kaba la khang pyrshah ban bam doh masi ha ki ïing-basa, jaka bam bad baroh ki jaka paidbah ha katei ka Jylla.
U Marcuise u la ong ba um lah ban pdiang ïa ka jingkhang ban bam doh masi da ka Sorkar la ka long ha kano-kano ka Jylla ruh, namar ka dei ka hok jong ki paidbah ban bam ïa kaba ki mon kaba ki mlien.
“Ha ka jingsngew jong nga ka rukom bam ka dei ka hok jong ki nongshong shnong. Ngam lah ban pdiang ïa kum kane ka jingkhang da kano-kano ka Sorkar ïa ki paidbah ha kano-kano ka Jylla”, u la ong.
U la ong shuh shuh ba kam long kaba bha ban shu pyrkhing ne mana ha ka rukom bam.
“Ngi ki riewlum ngi don bun jait ki jingbam bad ki rukom bam, kumta ban shu pyrkhing lane khang noh kam long kaba bha”, la ong u Myntri ka Jylla.
U Marcuise u la ong, “Kum ki nongshong shnong la buh ïa ki hok ba ngi lah ban leh, naduh ka hok ban kren, ka hok ban kamai, ka hok ban bam bad lada khang ka pyni ba la ïuhroit ïa ka hok jong ki nongshong shnong.”
Lah ban kdew ba na ka liang ki Nongïalam hapoh kane ka Jylla ba kynthup ïa u Symbud Myntri Rangbah, Bah Sniawbhalang Dhar bad u MLA ka BJP, Bah Sanbor Shullai ki la pynpaw ïa ka jingpyrshah bad ka jingbym sngew ïahap ïa ka rai jong ka Sorkar BJP ha Assam ban khang bam doh masi.
Na ka liang u MLA ka BJP na South Shillong u la ong ruh ba u la pyrkhreh ban phah da ka jingthoh sha ka Sorkar Pdeng bad kumjuh ruh sha u Myntri Rangbah ka Jylla Assam, Himata Biswa Sarma ban pynpaw ka jingpyrshah halor kane ka rai khang bam doh masi.