Shillong, Nohprah 10
Ka jingshah tuh jong ki arshaka bad ka jingshah prong tuh jong ki ïing ka la ïai bteng na kawei ka por sha kawei pat haduh ba ka la wanrah ïa ka jingbym shngaiñ shuh ha ki nongshong shnong.
Katkum ka khubor ba la ïoh na ki pulit la ong ba u Pranoy Dev Nath u la ai ka jingujor ba ha ka 7 tarik Nohprah, ki runar bym lah ban ithuh, ki la tuh ïa ka arshaka jong u kaba don ïa u registration number ML05-AA-1598, kaba la pynïeng harud surok kaba don hajan jong ka City Hut Dhaba, Shillong.
Ha kawei pat ka khubor, ki pulit ki la ïoh pdiang ka jingtip ba ha ka 7 tarik Nohprah, ha ka por kumba 2.30 dang step, ki runar bym lah ban ithuh ki la tuh ïa kawei ka arshaka kaba don ïa u registration number AS01-FK-9010 na ka phyllaw jong ka HDFC Bank kaba don ha New Hill Jowai ha West Jaiñtia Hills.
Kumjuh na ka liang jong u Madhai Ch Saha u la ujor sha ki pulit ba ha ka miet jong ka 6 tarik Nohprah, ka kali Mahindra Bolero pick-up jong u, kaba don ïa u registration number ML08-D-2712 ka la jah na ka jaka ba la pynïeng ha New Bhaitbari kaba hap hapoh ka thanat Rajabala ha West Garo Hills.
Ka Bedisha R Marak ruh ka la ujor ba ha ka step jong ka 7 tarik mynta u bnai, ki runar bym lah ban ithuh, ki la tuh ïa ka arshaka jong ka kaba don ïa u registration number ML13-A-5781, na Bakoldoba, Mendipathar ha North Garo Hills.
Ha kawei pat ka khubor, ka Ispita Sharma ka la ujor sha ki pulit ba hapdeng ka 1 tarik bad 7 tarik Nohprah, 2024, ki runar bym lah ban ithuh ki la prong jubor shapoh ka ïing jong ka kaba don ha Hawakhana, Tura ha West Garo Hills bad tuh ïa ka ksiar kaba shongdor kumba T.15 lak eiei.
