Mawkyrwat, Nohprah 10
Hadien ka jingangnud ki paidbah jong ka South West Khasi Hills District da ki phew tylli ki snem ban ïoh noh da ka surok kaba bha bad kaba kham heh, ha ka 10 tarik u Nohprah 2024, ka la urlong hadien ba u Myntri Rangbah ka Sorkar Jylla u Conrad K Sangma u la pynbna ba ka Sorkar ka la dep ban mang tyngka na ka bynta ban pynheh ïa ka surok Weiloi-Mawkyrwat ha ka jinglut kaba antad kumba T.120 klur lyngba ka World Bank MITP- 2 Road Project.
U Conrad u la pynbna ïa kane ha ka jingïalang pynkut ïa ka jingrakhe Jubili Ksiar jong ka Nativity Higher Secondary School ha Mawkyrwat.
U Myntri Rangbah u la ïathuh ruh ba shen tang mar ïa pyndep ïa ka DPR, yn sa khot ‘tender’ syndon na ka bynta ban shna ïa katei ka surok kaba lah ban dei ka surok Two- Lane ne ka Intermediate bad ka shong katkum ka jingdap ka pisa.
Haba ai jingkren ha katei sngi pynkut ïa ka Jubili Ksiar jong ka Nativity Higher Secondary School, u Conrad u la ïathuh ba ka Sorkar Jylla ka la trei shitom haduh katta katta ban kyntiew ïa ki kam jngohkai pyrthei, ki ban ai ruh shibun bah ki lad ïohkam ïohjam ïa ki samla khlem kam khlem jam, bad kumta ka Sorkar ka donkam ïa ka jingïatreilang bad ki Dorbar Shnong ryngkat ki trai khyndew na ka bynta ban kyntiew ïa ka kam jngohkai pyrthei ha South West Khasi Hills District.
Nalor kane, u Myntri Rangbah u la pynbna ba shen ka Sorkar kan sa khot ‘tender’ na bynta kawei ka ‘resort’ ha Nongnah kaba jngai kumba 30 km eiei na Mawkyrwat ha ka jinglut T.25 klur na ka bynta ban kyntiew ïa ki kam jngohkai pyrthei ha katei ka thaiñ.
U la ïathuh ruh ba ka Sorkar kan pyntrei ïa kane ka projek da ka jingïatreilang bad ki Dorbar Shnong lem bad ki trai khyndew ha kaba ïa ka jaka la ai da ki paidbah, ka Sorkar kan pynlut bad ïa ka jingïoh yn sa ïasam hapdeng jong ki kumba la leh ïa ka projek Rope Way ha Shillong Peak.
U Myntri Rangbah u la pynbna ruh ba ha ka shnong Mawlangwir ha ka jaka ba don ki mawbynna, ka Sorkar ka la dep ban mang kumba T.5 klur na ka bynta ban pynroi ïa kane ka jaka bad ïa kane ka projek ruh yn khot ‘tender’ noh shen.
U la ïathuh ruh ba ha ka shnong Jakrem ka Sorkar ka don ïa ka jingangnud ban wanrah projek da kaba ïatreilang bad ki paidbah, hynrei haduh mynta ka dang sahteng ha ka jingpynbeit ïa ki jaka.
Ha katei ka sngi pynkut ïa ka Jubili Ksiar ha kaba u Myntri Rangbah u la long kum kongsan, u la pynbna ruh T.25 lak kum ka jingnoh synñiang ïa ka Nativity Higher Secondary School, Mawkyrwat na ka skhim Chief Minister Special Development Fund na ka bynta ban pynheh ïa ka ïing skul.
Katba ïa ka Sngap Syiem College, u Conrad u la noh synñiang T.20 lak na ka bynta ban tei ïa ka Multipurpose Hall ha katei ka kolej.
Ha katei kajuh ka sngi, u Conrad u la ïoh ruh ban plie ïa ka ïing mala jong ka Science Block hapoh Sngap Syiem College, Mawkyrwat ïa kaba la bei tyngka haduh T.4 klur lyngba ka Rusa 2.0, kaba kynthup ïa ka ïing, ‘furniture’ bad ki tiar ki tar na ka bynta ka ‘laboratory’, bad kumjuh ruh ban pynïoh ïa ka skul Bus na ka bynta katei ka kolej.
Haba ai jingkren u Myntri Rangbah, u la ïathuh ba dang ha ka 9 tarik u Nohprah, ka Sorkar Jylla lyngba ka cabinet ka la mynjur ban sdang noh ïa ka Science bad Commerce Stream na ka bynta ki 5 tylli ki kolej Sorkar, kata, ha Sohra, Mawphlang, Baghmara, Williamnagar bad Mahindraganj bad ha kajuh ka por ka Sorkar ka la mynjur ruh ban mang tyngka noh (sanction) na ka bynta ki post bad na ka bynta ka Sngap Syiem College u la ïathuh ba ka Sorkar kan sa shimkhia na ka bynta ki jingdonkam.
“Ngi la sdang shwa na ki College Sorkar, bad shen ngin sa ïaid sa sha ki People’s College bad kane ka College jong phi ruh kan hap lang ha kata ka thup,” ong u Myntri Rangbah.
Shuh shuh u la ong ruh ba ka pule puthi ka dei kawei na ki mawjam ba kongsan tam jong ka imlang sahlang bad jong kano kano ka jaidbynriew, bad kumta ka jingpynlut ha ka pule puthi ka kham long kaba kongsan na ka bynta ka lawei bad dei na kata ka daw ba ha kine ki bun snem ba la dep ka la long ka jingpyrshang jong ka Sorkar MDA ban pynthikna ban ai kaba kongsan tam ïa ka pule puthi ha kaba ka don ïa ka mang tyngka kaba heh tam napdeng ki tnat Sorkar baroh kaba kot palat 15% na ka mang tyngka baroh kawei.
Ha katei ka sngi la ïadonlang u Bah Renikton L Tongkhar MLA, Bah Carnes Sohshang MDC ka Mawkyrwat, Fr. Alphonsius Wahlang, Principal ka Sngap Syiem College u Dr KK Nongsiej lem bad kiwei kiwei ki ‘riew rangbah.
