
Shillong, Nohprah 11
U Nongïalam ka NPP uba dei ruh u Myntri ka Sorkar Jylla, u Rakkam A Sangma, u la ong ba ka jingkhang bam doh masi ka Sorkar Assam, kan long ka kabu ïa ka Meghalaya ban buh dukan bam doh masi ha khappud Assam.
Haba kren ha ka sngi Balang, u Rakkam u la ong ba kan bha shibun ïa ki briew ha Meghalaya ban buh dukan doh masi ha Byrnihat, Khanapara, Paikan khnang ba ki briew na Assam kin wan ban bam doh masi namar ka jingkhang ha Assam.
“Ha kawei ka liang ka jingkhang ka Sorkar Assam ban shoh doh bad bam doh masi kan bha pynban ïa ka Meghalaya. Ki nong Meghalaya ki la dei ban plie syndon da ka seven star hotel ha ki thaiñ khappud bad ka Assam, kum ha Byrnihat, Khanapara bad Paikan. Ki dei ban shet ka doh masi kaba bang bha khnang ba ki briew na Assam kin ïoh ban bam bad leit phai biang pat sha Assam”, la ong u Rakkam.
U la ong ba ka jingkhang bam doh masi ka pynsngewsih bad ktah ïa kiwei ha kane ka ri laitluid, ha kaba u la pynpaw ruh ba um sngew ïahap ban khang ban bam doh masi namar ba lada kiwei kin khang ka ktah ïa kiwei pat bad kan wanrah ka jingbym sngewtynnat.
“Shu buh lada ka Sorkar Meghalaya ka rai mynta ba kito ki briew kiba wan sha Meghalaya lane Nagaland bad Mizoram ki dei beit ban bam doh masi, hato kane kan ym ktah ïa ki paralok hindu?”, u la ong.
Ha kajuh ka por u Nongïalam ka NPP u la ong ba ka jingkhang bam doh masi ka la pynhiar ïa ka kyrdan jong ka ri India, da kaba bynrap ba kum ka ri kaba la tip da ka pyrthei ka dei ban im ruh kumba long lang kiwei satlak ka pyrthei.
Lah ban kdew ba ka Sorkar Assam ka la khang ban bam doh masi ha ki hotel bad restaurant bad kumjuh ha ki jaka paidbah.
Kane ka jingkhang bam doh masi da ka Sorkar BJP ha Assam ka la pynmih ruh ki jingbym sngew ïahap na ki nongmihkhmat ka Jylla Meghalaya ba kynthup na u MLA ka BJP, Bah Sanbor Shullai bad kiwei ki Myntri Sorkar.