
Shillong, Nohprah 11
Ka Executive Committee jong ka Khasi Hills Autonomous District Council (KHADC) ka la mynjur ban wanrah noh da ki kyndon kiba pyrkhing ïa ki jaitbynriew ki bym dei trai muluk ka Jylla Megha-laya ban khanglad ïa ka jingïoh thied jaka ha Raid Marwet, Ri-Bhoi District ha khappud bad ka Assam, bad yn pyntreikam ruh ïa ki kyndon ban khanglad ïa ka jingthied jaka palat pud ki trai muluk ha kane ka thaiñ.
Ka Executive Com-mitee jong ka KHADC ka la ai jingmynjur ïa kane ha ka jingïalang kaba la long ha ka sngi Balang.
Haba kren sha ki lad pathai khubor, u Chief Executive Member (CEM) ka KHADC, Bah Pynïaid Sing Syiem, u la ong ba ka Executive Committee kan pynmih ar tylli ki jingpynbna ha kaba ïadei bad kane.
Kawei ka jingpynbna kaba pyrkhing ïa ka jingthied jaka ka dei na ka bynta ki trai muluk kiba thmu ban thied jaka biang khnang ban nym don ka jingthied jaka palat pud, bad kawei pat ka jingpynbna ka dei ka jingpyrkhing ïa ki bym dei ki jaitbynriew trai muluk ba kin nym ïoh thied jaka ha Raid Marwet.
Haba batai shaphang ka jingbuh da u pud katno dei ban shim jaka ha Raid Marwet, u CEM u la ong ba ki trai muluk kiba la don jaka lypa ha Raid Marwet kim dei ban palat ïa ka 2 akar lada buh homestay, ym dei ban palat 4 akar lada dei ba buh ki kynja karkhana, ka jaka ban tei resort ne hotel ym dei ban palat ïa ka 4 akar.
Ka jaka ban rep (agricultural or horticultural land), ym dei ban palat ïa ka 10 akar, na ka bynta ki jaka pule (educational establishment) kum ki skul ym dei ban palat 8 akar, kolej ym dei ban palat 10 akar, skulbah (university) ym dei ban palat 15 akar, ki jaka ai jinghikai pyntbit (vocational institute) ym dei ban palat 5 akar, jaka ban ri dohkha ym dei ban palat 3 akar, ka jaka ban ri syar ri sniang (poultry and livestock farming) ym dei ban palat 3 akar, jaka ban thung jingthung ym dei ban palat 12 akar.
Ka jaka ban tei hospital/nursing home/wellness centre ym dei ban palat 15 akar, sports academy/stadium/sports complex ym dei ban palat 5 akar, jaka ban tei ïa ki jaka mane ne jaka ki riewniam ym dei ban palat 5 akar, bad ka jaka ban tei ïa ki jaka ïadie-ïathied kam dei ban palat ïa ka 5 akar.
U CEM u la ong ba kane ka jingbuh da u pud ha kaba ïadei bad ka jingdie-jingthied jaka ha Raid Marwet ka dei ban pyrkhat ïa ka pateng hadien habud namar lada ailad, lehse wat ban thied lut ïa ka Ri Bhoi district baroh kawei ki kot bor ban thied.
U la ong ba kane ka rukom pyrkhing lehse kan long ka nongmuna ïa kiwei pat ki jaka.
Haba kylli halor ka jinglaitlan ka jingdie bad jingthied jaka ha Raid Marwet naduh ki phew snem ba la leit noh khamtam da kiwei ki jaitbynriew ki bym dei trai muluk ka Meghalaya, u CEM u la ong ba ka Executive Committee ka la dep buh da ka Committee ka ban sa leit jurip ïa ki jaka ha Raid Marwet ban wad jingtip mano ba dei trai ïa ki jaka la ki jaka ki dei kiba long trai da ki trai muluk ne da kiwei pat ki jaitbynriew ki bym dei ki trai muluk.
U la ong ruh ba kane ka kam jaka puta ha Raid Marwet ka long ka mat kaba khia bha bad na ka liang ka Council kan leh la ka jong ka kam ha kaba ïadei bad u Syiem Raid Marwet la ka dei ban weng noh ne thung da uwei pat ne shimti shwa shipor da ka Council ban pynïaid ïa ki kam hapoh jong kane ka Raid kaba hap hapoh jong ka Hima Mylliem.
Shuh shuh u CEM u la ong ba ka Council ka la dep pynsngew ruh sha ka Sorkar Jylla ba kan rah ïa ka mat sha ka Sorkar Pdeng ha kaba ïadei bad ka Constitution (ST) Order, 1950 halor ki riewlum kiba dei ki trai muluk ka jylla khlem da ïakhleh lang bad ki riewlum kiba na kiwei pat ki Jylla kiba wan sah ha Meghalaya.