Khot aplikeshon ka BJP ban sei kyrtong MDC sha KHADC & JHADC

Katkum ka jingpynbna la ong ba ïa ka thup kyrteng jong ki kyrtong yn sa phah sha ka State Election Commission ha ka 5 tarik Kyllalyngkot, 2025.

Shillong, Nohprah 11

Ka Bharatiya Janata Party (BJP) Meghalaya ka la khot aplikeshon na ka bynta kiba kwah ban ïakhun ïa ka ilekshon sha KHADC bad JHADC ba kin phah ïa ki kyrteng sha ki District President hapoh ka 30 tarik Nohprah 2024.

Katkum ka jingpynbna la ong ba ïa ka thup kyrteng jong ki kyrtong yn sa phah sha ka State Election Commission ha ka 5 tarik Kyllalyngkot, 2025.

Ki mat ba ka BJP ka tyrwa sha ki paidbah ha kane ka ilekshon ka long ban pynsted ïa ka jingpynbit jingpynbiang ban pynkylla ïa ka Khyrnit Ba Hynriew katkum ki jingdonkam ka por kaba la shu sahteng kumto ha ïingdorbar thawaiñ ka ri lane kata ka amendment of sixth schedule. Shuh shuh ka BJP ka thmu ban pynkupbor ïa ki Dorbar Shnong bad Dorbar Raid lyngba ka bhah kyrpang ha ka mang tyngka ne kata ka direct funding sha ki dorbar bad khamtam eh ban wanrah ïa ka rukom synshar shnong kaba ryntih ïa baroh ha ki lum Khasi bad Jaiñtia.

La ong ruh ba kawei pat ka mat ka long ban ri ban da ïa ki trai muluk bad ban pynkhlaiñ shuh shuh ïa ka rukom treikam ki council ha ka ban pynneh pynsah ïa ki tyllong um, ki khlaw ki btap bad ban pynskhem shuh shuh ïa ka khuid ka suba da kaba wad ki lad ki lynti ban wanrah ïa ki projek ban pynseisoh ïa ki ñiut ki jaboh ba lum na ki pud sawdong jong ki council ha ka jylla.

Shuh shuh la ong ba lyngba kine ki ilekshon, ka BJP ka kyrmen ban ïoh ïa ka kyrdan ha kaba ka seng kan lah ban leh eiei halor ka amendment ba la sahteng la slem jong ka 6th Schedule, ha ka rukom ka ban pynmyntoi ïa ka rukom pynïaid ïa ki bor synshar hapoh ka Jylla.