Nongstoiñ, Nohprah 11
Ka Federation of Khasi Jaiñtia and Garo People (FKJGP) Ri Mulliang Circle ha ka Sngi Balang ka la leit ban aiti ïa ka dorkhas sha u Deputy Commissioner (DC) ka West Khasi Hills halor katto-katne ki mat kiba ïadei ha ki bynta jong ki thaiñ khappud ka Assam bad Meghalaya.
Katkum ka dorkhas ba la aiti sha u DC, ka FKJGP ka la buh ïa ka jingkyntu bad dawa ban pyndep noh ïa ka jingïakren pynbeit pud bad ka Assam na ka bynta ka Langpih Sector.
Halor kane ka bynta ka FKJGP Rimuliang Circle ka la pynpaw ba kum ka seng ha ryngkat ki paidbah ka thaiñ Langpih ki dap da ka jingsngewkhia ïa ka jingïai sahteng ka kam pynbeit pud hapdeng ka jylla Meghalaya bad ka Assam kaba long ka mat kaba la sah slem haduh katta-katta ha kaba ki paidbah ka thaiñ Langpih ki la ïai angnud ba kane ka kam kan dep noh.
“Hooid ngi ïohi ïa ka jingshimkhia na ka liang jong ka Sorkar ha kine ki snem ba la dep ïa ka jingthmu ban pyndep noh ïa kane ka mat pynbeit pud kaba la dep ruh ban soi MoU na ka bynta ka jingpynbeit ha ka wat nyngkong (Phase-I) bad ba la pynsah ïa ka Langpih Sector ha ka wat ba ar (Phase-II), hynrei ngi diaw ban ïohi ba haduh mynta ïa kane ka wad ba ar ym shym pat la lah pyndep kum ka seng kaba ngi la ju ïai kren ïa kane kajuh ka mat na ka por sha ka por, ngi kyrpad jur eh ïa ka Sorkar ba kan shimkhia noh kham kloi ban pyndep ïa kane ka jingïa pynbeit noh shi syndon ïa u pud u sam,” ong ki nongïalam FKJGP.
Katba ka mat ba ar, kaba la pynpaw da ka FKJGP ka long ba dei ban shna jaka sah noh ïa ki pulit hapoh shnong Umwali, ha kaba kumba ka long mynta ki pulit hapoh ka shnong Umwali kim don ïa ka jaka la ka jong hynrei ki shu sah hapoh ka ïing skul jong ka Umwali Presbyterian LP School.
Nangta, ka mat ba lai ka FKJGP ka la dawa ban pyntreikam pura noh ïa ka Ri-Muliang Block.
Ka FKJGP ka la ong ba kumba ka long mynta ka Ri-Muliang Block kaba la dep plie naduh u snem 2022 haduh mynta la ar snem kam pat trei kam pura kum ka Block. Kumta khnang ba ka roi ka par khamtam ha ki thaiñ khappud kan kham ïaid sted bad kan pynjan ïa ki paidbah ka thaiñ, ka seng ka kyntu ïa ka Sorkar ba kan pyntreikam pura noh ïa kane ka Block kumba long lem ha kiwei kiwei ki Block.
