Shillong, Nohprah 11
Ki ar tylli seng ‘riewlum kiba don hapoh ka Regional Democratic Alliance (RDA), ka United Democratic Party (UDP) bad ka Hill State People’s Democratic Party (HSPDP), ki la rai ban ïaid noh la ka jong ha ka ilekshon MDC ka ban sa long ha KHADC bad JHADC ha u snem ban wan.
Ïa kane ka rai la shim lang ha ka jingïalang kaba la long ha ka Sngi Balang ba la pynïaid da u President ka UDP, Bah Metbah Lyngdoh ha ka jingïadonlang u President ka HSPDP, Bah KP Pangniang nalor ki nongïalam na baroh ar tylli ki seng.
Haba kren sha ki lad pathai khubor, u Bah Metbah u la ong ba kum ka RDA ki la rai ba ha kane ka ilekshon MDC, ka UDP kan ïakhun la ka jong bad ka HSPDP ruh kan ïakhun la ka jong.
U la ong ba ïa kane ka rai la pynshong nongrim na ki jingshem ha ki snem ba la leit noh bad ka jingdonkam ban burom ïa ka jingsngew jong ki nongtrei ka seng ha ki konstitwensi bapher bapher.
U Bah Metbah u la pyntip ruh ba ki ar tylli seng ‘riewlum kin ïai bteng ban ïatreilang pat ha ka lama jong ka RDA.
Nalor kane, u la pynkynmaw ba ka RDA ka dei kaba la thaw ym tang na ka bynta ban ïakhun ilekshon hynrei na ka bynta ban shim ïa ki mat bapher bapher kum ka Inner Line Permit (ILP), ban ïohi jingithuh ïa ka ktien Khasi bad Garo ha ka Khyrnit ba Phra ka riti synshar ka ri, ka jingpynbeit ïa u pud u sam bad kiwei kiwei ki mat kiba ktah ïa u paidbah bad ïa ka Jylla.
“Ka rai mynta ka sngi ban ym ïatreilang ha ka ilekshon kam mut ba ka RDA kam don shuh. Nga kwah ban kren jam bad shai biang bad kwah ruh ban ïai ban ba ka RDA ka dang skhem bad kan dang bteng ban ïatreilang hadien kane ka ilekshon ruh”, la ong u Bah Metbah.
Haba kylli, u President ka UDP u la ong baroh ar tylli ki seng ki long laitluid ban pynïeng ïa kino-kino ki kyrtong na kano-kano ka konstitwensi ba ki kwah.
