
Nongpoh, Nohprah 11
Ka Congress ha Jirang konstitwensi ka la nang ïoh bor ïoh mynsiem bad nang khlaiñ hadien ba u Bah Victor Rani, MDC ka thaiñ uba la jop la ar sien kynthih, u la leit phai ban pynïasoh biang sha ka Congress ha ka jingïalang kaba la pynlong ha ka Sngi Balang ha Byrnihat.
U Bah Victor Rani u la jop nyngkong ïa ka ilekshon MDC ha u snem 2014 na ka seng Congress bad ha u snem 2019 u la ïoh biang ka jingjop ynda u la ïakhun na ka NPP.
Ha kane ka sngi, ïa u Bah Victor Rani, la pdiang sha ka Congress da u Bah MG Kharshanlor, President ka Ri Bhoi District Congress Committee (RBDCC) ha ka jingdon ryngkat u Bah Rocky A Marweiñ, kyrtong MDC ka seng na Umsning, u Bah Phrangsngi Syngkli, President ka Jirang Block Congress Committee (JBCC), u Bah Adrian Chyne Mylliemngap, President ka Meghalaya Pradesh Youth Congress (MPYC) nalor kiwei kiwei ki nongïalam bad ki spah ngut ki paidbah nongkyrshan.
Haba kren ha kane ka sngi, u Bah Victor Rani u la pynpaw ïa ka daw kaba la pynlong ïa u ban ieh noh ïa ka NPP kaba u la mihkhmat mynta ka dei halor ka jingthaw buit sop-sop jong ki dkhot ka NPP Jirang Block ban pynduh tiket ïa u bad leit pynshoi ruh sha u Bah Prestone Tynsong, State President ka NPP ba lada ai tiket ïa u, un nym poi shuh shaei-shaei ruh.
“Kaba sngewsih ngan pynpaw sha phi ki paidbah ba ha ka 9 tarik u Naiwieng 2024 ki pynlong ïa ka jingïalang jong Block Committee ha 9 Mer bad kyndit-kyndit kumba ïuh tdong bseiñ, hangta ki dkhot jong ka NPP Jirang Block ki ong ba ïa u MDC jong ngi ba mynta dei ban bujli noh naba ki paidbah kat shaba leit sha ki shnong nongkyndong ki ong ba um long shuh,” la ong u Bah Victor Rani.
Shuh shuh, u Bah Victor u la ïathuh ruh kaba la nang pynsngewsih shuh ïa u, ka dei ha ka jingïalang jong ka NPP ka Jylla lane kata ka State Level Meeting kaba la pynlong ha ka 29 tarik u Naiwieng, 2024, ha kaba ki President jong baroh ki district ki la pynpaw ïa ki kyrteng jong ki kyrtong kiba la ïoh, bad ka kyrteng ka jong u ruh ka paw na Jirang Block, hynrei kyndit hangta ruh u MLA ka Jirang, u Bah Sosthenes Sohtun, u la ïeng bad pynshai ba ka kyrteng jong u Bah Victor Rani la shu phah ktien (verbally) bad ym da ka jingthoh (officially).
Na ka liang ki nongïalam ka Congress ha Ri Bhoi District haba ai jingkren, ki la pynpaw ïa ka jingsngewkmen ba u Bah Victor Rani, uba la jop nyngkong na ka tiket ka seng ha u snem 2014, u la wan ban pynïasoh biang ïalade sha ka seng bad pynpaw ruh ba kane ka jingwan pynïasoh une u nongïalam uba la jop ar sien kum u MDC, kata ha u snem 2014 na ka Congress bad ha u snem 2019 na ka NPP, kan nang aibor bad nang pynkhlaiñ shuh ïa ka seng ha Jirang konstitwensi bad kyrmen skhem ba kin ïoh ïa ka jingjop donburom ha kane ka ilekshon MDC ka ban sa long ha u snem 2025.