
Bertina Lyngdoh
Khlem lap sngewthuh ki sngi ki por ki la ïaid bad u snem ruh u la kut. Ma nga ma phi bad ma ki ngi lah ban ap ïa iwei-ïa-iwei, hynrei dei ka por keiñ ka bym lah ban ap ïano-ïano ruh. Ha ka jingim briew, u briew u la nang ïaid na kawei ka rta sha kawei pat, ha ka jingïatyllun ki sngi ki por. Ki por ba la leit noh, ki lah ban long ki por ka jingkhuslai, ka jingduh kyrmen, ki jingmad jingshem ba sngewsih bad kumta terter. Ki sngi ki ban sa wan pat, ki ha ka jingshisha ki long ki sngi sha ka jingkyrmen, ki sngi ban kylla bad im thymmai.
Kumta, ai ba ki por ba la leit noh, kin long kum ki jinghikai ban nang ïai im ha ka jingkyrmen. Baroh ngi kwah ban man bha bad ban urlong ki jingthrang jong ngi. Shibun kiei-kiei kiba ngi la mad bad shem kata kaba sngewsih bad khamtam ïa ka bym lah klet shuh ruh. Haba kiei-kiei kim long bha ngi diaw ngi khuslai bad ym don jingkyrmen shuh. Don lei ki por ba ha ka jingtlot briew, ngim sngew don lad don lynti shuh. Lehse ju don ruh ki khep ba lada ngim ïap shuh mynta namar i jingeh ngi sngew ba lada ngim ïap mynta te ngin ym ïap shuh. Ka jingbym im u briew ha ki jingkyrmen, ka lah ban dei namar u kham long marwei, bad ba u duna bha ki jingkyrshan ïa u. Kum ka nuksa, lada ki jingpule kim biang, lah ban long ka kamai-kajih, ka koit ka khiah bad kiwei kiwei. Kum kine, ki lah ban long ki daw ban khuslai bad duh jingkyrmen. Lada kine ki dei kita ki daw un don ka jingmut baroh la kut ki lad ïa u.
Kumta, ko hynmen ko para, baroh ngi don la ki jingeh, hynrei ai ba kita kin long ki ban pynkhih ïa ka mynsiem jong ngi ban ïakhun tyngeh, ban trei shitom ba sha ka jingkyrmen to ngin im. Ieh bad klet ïa kaba la dep, bad im sha ka jingkyrmen ïa ka ban sa wan. To im sha ka jingkyrmen khnang ba ngin long kiba koit ba khiah khamtam ha ka jinglong mynsiem. Wat kynrandien, kyrmen ha ki sngi ki ban sa wan, ki sngi kiba thymmai ba kiei-kiei baroh kin long bha. Ai ka jingsngewnguh sh’u Blei ïa ki por ki sngi ba la leit noh bad duwai da ka jingngeit bad im ha ka jingkyrmen.