Ka jingpeitkai

D H Kharkongor U ‘eriong ‘erngit bad u phria ki dei kiei kiei kiba ki nongrep ki ju tieng ju smiej khamtam ha kum kane ka por. Kata kaei kaei kaba ki nongrep ki tieng...

D H Kharkongor

U ‘eriong ‘erngit bad u phria ki dei kiei kiei kiba ki nongrep ki ju tieng ju smiej khamtam ha kum kane ka por. Kata kaei kaei kaba ki nongrep ki tieng ki smiej ka wan urlong. Ka da jia pat de ruh kyndit kyndit, ha ka por kaba kim poi pyrkhat. Wat nga ruh ngam lah khlem da khuslai jingmut, kata, haba nga iohi ïa ka jinglong jingman jong ka suiñ-bneng, ha kato ka sngi. Ha ka jingsngewthuh ka jong nga ka dei ka dak ka shin ba u ‘phria’ un salynshop. Kumta ïa kiwei ka dei hamar ka por kaba ki dang shu dep ban lumthup ïa u kba uba ki dang shu dep ban ot, kata, hamar shwa ba kin ‘shohkba’. Katba ïa kita kiwei pat de ka dei hamar ka por kaba ki dang pynkhreh ban ‘ot’ noh ïa u kba uba la ih.

Kumta ym lah khlem da sngewsynei ïa ki bapli ki nongrep kiba mad ïa kato ka jingpynjulor noh jong ka bor mariang ïa u kba u khaw u jong ki, uba dang don ha pynthor. Kam long ruh kaba eh ban sngewthuh haduh kata kaei kaei ka ktahjur bha ïa ki, kaba katno tam ïa ka ioh ka kot ka jong ki. Kaei kaba ki bapli ki angud ka lahpulom noh. Kat ka syep ka syar kaba ki jaw ka lah shu sepei noh. Nga ngeit ba ym duh ban don napdeng jong ki kiba poi ban kylli ïalade, wat ïa U Blei, uba U Trai bad U Kynrad halor jong kiei kiei baroh – “Kaei kane bad balei kumne”.

Kiba kham bun ki lait hi war na kato ka jinglynshop kaba tyngeh ka jong uto u ‘phria’. Wat kumne mynta ruh ki don napdeng jong ki kiba dang shu dep ban ‘ot’ bad ban ‘shoh’ ïa u Kba bad ki don kiba dang khreh ban ‘ot’ bad ban ‘shoh’ ïa u Kba. Ka jingkmen bad ka jinghun mynsiem ïa kiba la lah ban pynpoi hi tiap ïa u ‘Kba’ ha la ka jong ka ‘thiar’ lane ‘sem’. Ym artatien ba ki dap da ka ‘jingsngewnguh’ ïa u Blei, uba U Trai bad U Kynrad halor jong kiei kiei baroh. Nga ngeit ruh de ba ka dei ka ‘jingkyrmen’ ïa kita kiwei pat. ïa baroh lang nangne sha khmat ka dei sa ka por ba kin lum kin lang ïa u ‘skumkba’ uba dei ka lad kamai kajih ia baroh wei ba u dei uwei napdeng jong ki ‘jingbam’ jong ki masi. Kumta ngin sa nang ïohi ïa ki kali kiba kit kyrpang ïa u ‘skumkba’.

Katba ïa ki khynnah pule, khamtam ïa ki ‘khynnahskul’, kane mynta ka dei ka por jong ka ‘Final Examination’. ïa ki ka dei ka ‘por’ jong ka jingpynleit jingmut beit thop ha ka jingpule ïa ki ‘kot pule’. Ka por jong ka jingïaleh shitom ban ‘sngewthuh shai’ bad ‘kynmaw’ ruh de ïa kat kaba ki dei ban ‘pule’. Ka por jong ka ‘peitmied peitïong’ kaba lem bad ka ‘khiekham step’ bad namar kata ka por jong ka ‘jingthait’ jong ka ‘bor pyrkhat’ kaba lem bad ka ‘jingkyndeh mynsiem’. Katba ïa ki kmie ki kpa ki jong ki pat de ka dei ka por jong ka jingkhuslai kaba naduh ka jingmut jingpyrkhat tad haduh ka mynsiem. Kata kam laitwei ba, ha kaba ïadei kyrpang bad ka ‘pule puthi’ ka jong ki khun ki jong ki, ki angnud ba kane ka snem kan nym shu sepei.

Haba poi biang sha ka ‘por’ ba ha nga hi shimet ngi dang shu dep ban rung sa sha ka ‘Tlang’. La katta nga sngewmat ka suiñbneng ka khamsyaid ban ïa kiwei kiwei ki snem. Ym artatien ba katba nangïaid ki sngi bad ki taïew ngin sa nang sngewthuh shai ïa ka jingkhriat jong ka ‘Tlang’ khamtam mynmied mynïong bad ym eh tang ha ka por mynstep bad hadien ka por sepsngi. Ki phlang bad ki kynbad ki la nangkhreh ban iapstai, kumjuh u ‘piskot’ bad u ‘pathaw’, kata, haba bishar shwa tang na ki ‘jyntang’ lem bad ki sla ki jong ki. Ngam artatien ba ka ‘um-jer’ kan sa nang jaw khamjur. Ha ka jingïadei bad u ‘thah’ pat te lehse un kham duna ban ïa ki snem kiba la dep. Lehse ka ‘Pyrem’ ka ban sa wan, hadien jong kane ka Tlang, kan khamjlan bad ka jingtyrkhong raw jong ka mariang ruh kan khamjur, kaba katno tam ka jingringswaika jong ki um ki wah lane ka jingkyrduh ïa ka um.

Ha shwa ban ïa kutnoh to shah ngan pynkynmaw biang sa shisien ba nga kham pynleit jingmut ïa kitei kiei kiei ban ïa kine ki ‘Drama’ ki jong ngi u ‘khunbynriew’. ïa kane ka ‘Drama’ kaba ïadei bad kata ka ‘Shillong Ropeway Project’ lei te ngam kwah ban kynthoh eiei ruh em naba wat kat ïa ka ruh nga dang ïaijied ban long beitnoh tang u ‘nongpeitkai’ lane ‘spectator’. Kumta nga shu ïehbeit ïa ka ha ka ‘por’ ba kan batai shai ïa kaba kut ka jong ka.