Shillong, Nohprah 11
Wat hapdeng ka jingkiewdor ki marbam-mardih bad ki mar-ki mata na ka por sha ka por, la ïohi pat ba ka na ka liang ka tnad Labour, Employment and Skill Development ka Sorkar Jylla katkum ka Notification ba la pynmih ha ka 03 tarik u Nohprah, 2024 ka la kdew ba ka jingpynkiew bai bylla sngi ka long mar T. 2 ïa ki Unskilled bad ki Semi Skilled bad mar T. 3 pat ïa ki Skilled bad ki Highly Skilled.
Halor kane ka jingshah khñiot beiñ ki nongtrei Unskilled, Semi Skilled, Skilled bad Highly Skilled da kaba shah kyntiew bai bylla sngi kaba tang da T. 2 bad T. 3, na ka liang ka Khun Hynñiewtrep National Awakening Movement (KHNAM) hapoh ka jingïalam u Bah Thomas Passah, Working President ka la leit ban mih sha ka shlem treikam jong ka Labour Commissioner ha ka nohphai sngi jong ka 11 tarik u Nohprah, 2024 ban ïakren halor kane ka bynta.
“Ha kane ka juk kaba mynta, kam long shuh kaba ïahap ban kyntiew tang T. 2 ne T.3 na ka bynta ki paidbah kiba im ja da kane ka kam bylla sngi la ka dei ha ki tnad Sorkar bapher-bapher lane kiwei-kiwei ki tnat treikam ruh”, ong u Bah Passah.
Haba kren sha ki lad pathai khubor, u Bah Thomas u la ong ba lyngba kane ka Notification ka kdew ba yn sa pyntreikam ïa kane ka jingpynkiew bai bylla sngi naduh u Risaw, 2024 kata T. 419 tyngka ïa ki Unskilled, T. 474 ïa ki Semi Skilled, T. 530 ïa ki Skilled bad T. 586 ïa ki Highly Skilled.
U la ong ba kane ka jingpynkiew bai bylla ha u bnai Ïaïong, 2024 lyngba ka tnad ka long T. 417 ïa ki Unskilled, T. 472 ïa ki Semi Skilled, T. 527 ïa ki Skilled bad T. 583 ïa ki Highly Skilled bad kumta ka don jingïapher tang T. 2 bad T. 3.
Shuh-shuh, u Bah Passah u la ong ba lada phaikhmat ha kaba ïadei bad ka Minimum Wages Act, 1948, la wanrah ïa kane ka aiñ da ka jingthmu ban ïada ïa ki nongbylla sngi ba kin ïoh ïa ka jingsiew kaba biang khnang ba kin lah ban ïeng ha la ki jong ki kjat bad ban ïoh ïa kata ka jingim kaba ki lah ban im hynrei ha kane ka jinglap pat, la ïohi ba kane ka jingpynkiew tang da T. 2 ne T. 3 ka long pyrshah ïa katei ka aiñ.
U la ong ba ha ka jingïakynduh jong ka seng ïa ki bor ba halor jong ka tnat Labour, la sngewthuh shai ba na ka liang ka Labour Bureau ki khlem peit ne pule sani bha ban tip ïa ka dor jong ki marbam-mardih ne mar-ki mata khnang ba kin ïoh ïa ka dor kaba long ïahap bad ka rukom im ha kane ka juk kaba mynta.
“Ngi banjur ïa ka Sorkar bad ngi banjur ïa u Myntri Rangbah ka Jylla uba dei u Myntri ba dei khmih ïa ka Tnat Pla Tyngka ba ngin ïa peit lang ruh ïa kine ki jingeh jong kine ki bylla sngi ym dei eh tang ïa ki ‘concert’ ne tamasa ïaput-ïatem hynrei dei ban peit lang ïa kine kiba kamai mynstep bad bam mynmiet, bad lada ngim lah ban leh ïa kata ka mut ngi ïoh ïa ka synshar-khadar kaba noh shiliang ka bym don ïa ka jingkitkhlieh na ka bynta u duk-u suk”, ong u Bah Passah.
