Shwa ka Khristmas yn pynbna ka Congress ïa ki kyrtong MDC: Ronnie

U Bah Ronnie V Lyngdoh uba dei u MLA bad MDC ka Congress na Mylliem Konstitwensi u la ong, ha shwa ka jingrakhe ïa ka Khrismas, ka seng kan sa pynbna noh ïa ki kyrtong...

Shillong, Nohprah 11

U Bah Ronnie V Lyngdoh uba dei u MLA bad MDC ka Congress na Mylliem Konstitwensi u la ong, ha shwa ka jingrakhe ïa ka Khrismas, ka seng kan sa pynbna noh ïa ki kyrtong na ka bynta ka ilekshon MDC ka ban sa long shen ha u snem 2025.

Ha ka jingïakren bad ki lad pathai khubor ha ka Sngi Balang u Bah Ronnie u la ong, ki don ki konstitwensi kiba la pan tiket haduh 2-3 ngut bad ka seng kan hap ban peit bniah shwa katkum ka rukom pynïaid. U la ong ruh ba lada bun kiba pan tiket ka seng kan sa bishar sani bha bad hap ban peit mano na kine ki nongwan pan tiket kiba na ka liang ki paidbah ki kwah ban pynïeng hynrei lada don tang uwei pat uba pan tiket na ka konstitwensi ban ïakhun, ka seng ka lah ban pynbna noh shen.

Shuh-shuh, u la ong ruh ba ka Congress ka dei ka seng kaba la slem bha bad kaba don ïa ki tnat treikam bapher-bapher bad ong ba ka jingmih noh ki MLA napoh ka Congress kam don jingpher namar ha kitei ki konstitwensi ba la phet ki nongmihkhmat, ki don haduh kumba 2-3 ngut kiba pan tiket MDC na ka seng ban ïakhun ïa ka ilekshon bad ong ba ym tang katta hynrei ki don ruh ki briew kiba na kiwei pat ki seng kiba pan tiket ban ïakhun na ka Congress.

“Ka jingmih jong ki kam pher hynrei ngan ïathuh ïa phi na kito ki konstitwensi kiba mih ki MLA, ki don ki nongpan tiket haduh 2-3 ngut ha ka MDC bad na kiwei ki seng ruh, ki lah kwah pan tiket na ka Congress jong ngi”, ong u Bah Ronnie.

Ha kaba ïadei pat bad ka tiket ban ïakhun napoh ka Mylliem Konstitwensi, u Bah Ronnie u la ïathuh ba ka seng ka la rai ban ai ïa u Bah Banphiralang Basaiawmoit uba dei na Nongkseh bad uba la ïadonbynta ha ka imlang-sahlang.