Wanrah ka KHADC ïa ki kyndon ban khang syndon ka ot kilo ïa ki mar rep

Ka Executive Committee jong ka Khasi Hills Autonomous District Council (KHADC) ha ka Sngi Balang ka la rai ban wanrah noh ïa ki kyndon jong ka Market Act, ka ban khang pyrshah ïa ka ot...

Shillong, Nohprah 11

Ka Executive Committee jong ka Khasi Hills Autonomous District Council (KHADC) ha ka Sngi Balang ka la rai ban wanrah noh ïa ki kyndon jong ka Market Act, ka ban khang pyrshah ïa ka ot kilo ïa ki mar rep ba wan die da ki nongrep sha ki ïew ki hat ha Ri-lum Khasi.

U Chief Executive Member ka KHADC, Bah Pynïaid Sing Syiem u la ong ba kawei na kine ki kyndon ka dei ka Khasi Hills District Establishment, Management and Control of Market Rules 2024 kaba pynshong nongrim na ka Khasi Hills District Establishment, Management and Control of Market Amendment Act 2023.

“Ka jingmyntoi lyngba kane ka Rules ka long ba ki nongrep ha kylleng ka Rilum Khasi kiba hap hapoh u pud u sam jong ka KHADC kim dei shuh ban shah ot kilo ki mar rep haba ki leit die sha ki ïew ki hat,” u la ong.

U la ong ba ka Council ka la ïoh ïa ka bor lyngba ka aiñ ban thaw ïa ka Sub Committee bad ha kane, kine ki kyndon kan kham pynshai shuh shuh ba kan ym don kata ka jingot kilo la ka long ha ki ïew jong ka District Council, Hima, Shnong ne jong ki riewshimet.

U CEM u la ong ba kan don ruh kawei ka Committee ka ban shim ïa ka rai ban pynshitom ïa kino-kino kiba ïaid pyrshah ïa kine ki kyndon, khamtam ha kaba ïadei bad ka jingot kilo ïa ki mar rep jong ki nongrep katkum ba la bthah ha ki kyndon.