
Shillong, Nohprah 12
Ka Dorbar Shnong Langkyrding Mihngi, Shillong kan pynlong ïa ka jingpynkhuid shnong, ha ka 18 tarik mynta u bnai. Ha kane ka sngi kan sa don ka jingkhang shnong naduh ka por 8 baje mynstep haduh 12 baje mynsngi.
Kumta la kyntu ïa ki dukan bad ki kali kamai kiba na shnong ba kin sangeh treikam ha kitei ki por. La wer ruh ïa baroh ban ïamih paidbah, bad shimkhia ban pynkhuid ïa la ki jong ki bynta jong ka shnong kumba la ju leh ha ki por pynkhuid shnong baroh.
Kumjuh ruh la ïawer kyrpang ïa ki trai kiba bat jaka hapoh kane ka Dorbar Shnong bad ki bym pat shna ïing sah ba kin ïasnoh kti lang ha kane ka jingpynkhuid shnong.
Ha kawei pat ka khubor ka Dorbar Shnong Mawlai Mawïong Rim kan pynlong ïa ka jingpynkhuid shnong ha ka 18 tarik mynta u bnai. Kumta la kyrpad ïa baroh ki trai jaka kiba don jaka hapoh shnong ba kin wan mih ha katei ka sngi lane shwa, ban pynkhuid ïa la ki jong ki jaka. La shem ruh ba bun bun snem mynta, ki don ki trai jaka ki bym shym la wan mih shapoh shnong, ki bym pynkhuid ne ker ïa la ki jong ki jaka.
Namar kata, la kyntu ba kin wan mih khnang khnang. Lada jia ba kim wan mih, ka shnong kan sa pyrkhat kumno ban pyndonkam noh ïa kine ki jaka.