Ba ïatyngkhuh ka sngi thep ‘vote’ bad ka eksamin SSLC & HSSLC, 4 tylli ki tarik pynap lypa ka tnat DCA

Ka eksamin HSSLC kan sdang ha ka 18 tarik Rymphang, 2025 bad kan kut kham slem namar ka jingpud sngi ban pynlong ïa ka eksamin.

Shillong, Nohprah 12

Ka tnat District Council Affairs (DCA) ka hap ban jied ïa ka tarik kaba biang na ka bynta ka sngi thep ‘vote’ ha ka ilekshon ban jied ïa ki nongmihkhmat sha ka Ïingdorbar Khasi Hills Autonomous District Council (KHADC) bad Jaiñtia Hills Autonomous District Council (JHADC) ha u snem 2025.

Ka tnat DCA ka hap ban jied da ka tarik kaba biang namar ka sngi thep ‘vote’ ka lah ban ïatyngkhuh bad ka jingpynlong ïa ka eksamin matrik lane Secondary School Leaving Certificate (SSLC), 2025.

Ka eksamin SSLC, 2025 kan sdang naduh ka 10 tarik Rymphang  bad kan kut ha ka 21 tarik Rymphang.

Ka eksamin HSSLC kan sdang ha ka 18 tarik Rymphang, 2025 bad kan kut kham slem namar ka jingpud sngi ban pynlong ïa ka eksamin.

Lada pynlong ïa ka jingthep ‘vote’ ha kawei na kitei ki tarik, ka jingñiew ‘vote’ pat kan long hadien ar sngi.

Ki lai tylli ki tarik, ka 20 tarik Rymphang, 21 tarik Rymphang bad 22 tarik Rymphang 2025 ki dei kiba dang don hapdeng ka eksamin SSLC bad kan long ka jingeh kaba khraw ïa ki briew kiba dei ban pynïaid ïa ka ilekshon ban leit sah lypa sha ki jaka thep ‘vote’ namar ki don ruh katto-katne tylli ki jaka thep ‘vote’ kiba dei ruh ki examination centre lane ki jaka thoh eksamin SSLC bad HSSLC.

Ka jingpynlong kloi ka Meghalaya Board of School Education (MBoSE) ïa ka eksamin SSLC bad HSSLC ha u snem 2025 ka dei ka daw kaba pynlong ïa ka tnat DCA ban ym lah ban jied lypa tang kawei ka tarik na ka bynta ka sngi thep.

Ki kot ki sla kiba ïadei bad ka jingpynbeit ïa ki sngi pynlong ilekshon MDC hap ban phah sha u Lat ba un ai ka jingmynjur ha kaba ïa ka sngi thep ‘vote’ la pynap lypa haduh saw tylli ki tarik.

Ka jingpynlong ïa ka ilekshon ban jied thymmai ïa ki nongmihkhmat sha ka Ïingdorbar KHADC bad JHADC hap ban pyndep shwa ka 5 tarik Lber, 2025.

Ka Ïingdorbar KHADC bad JHADC ki hap ban ïoh ïa ki dkhot kiba thymmai ha ka 5 tarik Lber lane shwa jong ka 5 tarik Lber, 2025 namarba ka samoi treikam jong ka KHADC bad JHADC kan kut noh ha ka 5 tarik Lber 2025.