
Tura, Nohprah 12
Ki dkhot ka GSMC bad ka GSU (Zikku Balgra), lyngba ka jingpahara miet ki la lah ban bat ïa kawei ka kali kit dieng be-aiñ katba ka dang ïaid shabar na ka Damalgre – Rerapara Reserve kaba hap hapoh SWGH ha ka por kumba 11:30 baje ha ka miet Sngi Ba-ar.
Ka jingpahara ïa ki kali kit dieng be-aiñ ka la wan hadien ka jingujor na ki nongshong shnong ba ki nongkhaïi tuh – na ka thaiñ bad Assam ki la pynsyllen suki-suki ïa ka Reserve lyngba ki kam jong ki.
“Ngi la ïoh jingtip na ki nongshong shnong ba la pom dieng na ka Reserve bad ngi la ïakynduh lang bad ka GSMC ban bat ïa ki. Ha ka por kumba 11:30 baje, ngi la lah ban bat ïa kawei ka kali kaba don ki dieng ba la dep ot bad khlem ka nombor kali. Hadien, ngi la aiti ïa ki sha ka Tura Range ban leh ïa kaba donkam,” pyntip u dkhot ka GSU, u Gamgam Sangma.
Ka jingjia hynnin ka sngi ka wan jia hadien jong kawei pat ka jingjia ha kaba kawei ka kynhun pulit ka la jan shah thombor bad ka kali jong ki ka la shah pynjulor haba ki leit ban beh ïa kawei ka kali kit dieng be-aiñ ha ka shnong Phersakandi ha WGH.
Kaba sngewlyngngoh ka long ba ha baroh ar tylli ki jingjia, baroh ar tylli ki kali kim shym don ïa ki nombor kali.
Ha ka jingjia ha Rerapara – Damagre Reserve, kumba ka paw, ki don sa ar tylli kiwei pat ki kali kiba don hadien jong kaba nyngkong hynrei ki la ïoh ban phet krad ha ka por ba ki ïaleh pyrshah. Ki CSO ki la ujor FIR ruh sha ka ophis jong ka Tura Range.