Jowai, Nohprah 12
Ka shnong Darrang ka la sei da u nongïalam ka Jaiñtia Students’ Union (JSU) kum u kyrtong ban ïakhun ïa ka ilekshon MDC sha ka Jaiñtia Hills Autonomous District Council ka ban long ha u snem ban wan.
Une u nongïalam ka JSU u dei u samla Treiborlang T Suchen uba bat kum u General Secretary ka JSU.
Ha ka kyrwoh khubor la pynpaw ba ha ka 11 tarik Nohprah, ka shnong Darrang ha ka jingïadonlang ki nongïalam shnong, ki ‘riew rangbah bad ki khun samla ka shnong Darrang da kawei ka sur ki la rai ban sei ïa u samla Treiborlang kum u kyrtong ha ka ilekshon MDC ka JHADC.
Ïa kane ka jingïalang paidbah la pynlong hapoh ka hall ïing skul ka shnong bad hadien ka jingïathir sani bha da baroh kiba wan shim bynta ki la rai ban sei hi da u khun ka shnong kata ïa u samla rangbah u Treiborlang R Suchen.
Baroh ki nongkren ki la ai ka jingkyrshan namar ba u samla Treiborlang u la don lypa ha ka kam shakri paidbah ne trei kam bhalang bad um dei satia uba dang thymmai ha ka kam ban ai ka jingshakri bad ka por ka la dei eh ban sei ïa ki samla kiba nang ban ïasaid na ka bynta ka jaidbynriew, ka riti ka dustur bad ka kolshor.
Ki paidbah ka shnong Darrang ki kyrpad rit sha kiwei ki para marjan shnong bad khamtam ïa ki para konstitwensi na ka War West ban tylli bad kyrshan lang ïa u samla Treiborlang Raul Suchen.
