
Nongpoh, Nohprah 12
Ki nongïalam jong ka National Peoples’ Party (NPP) Jirang Block kiba la shong jingïalang kyrkieh ha ka sngi Palei ha 13 Mer ban ïakren pyrkhat halor ka jingmih syndet jong u Bah Victor Rani, MDC ka Jirang konstitwensi na ka seng bad leit ban pynïasoh sha ka Congress, ki la kyntait war ïa ki jingkynnoh jong utei u MDC da kaba ong ba kim shym la don satia ka jingmut sniew lane ka jingthmu pynduh tiket MDC ïa u na ka NPP.
Ki nongïalam ba kynthup naduh u Bah Sosthenes Sohtun, MLA ka Jirang konstitwensi, Bah Clement Mawlong, President ka NPP Ri Bhoi District lem bad u Bah Marcus Lapasam, President ka NPYF Jirang Block haba kren sha ki lad pathai khubor, ki la kubur ba hooid ka don ka sur kaba la mih na ki nongïalam ba u Bah Victor Rani um shym la don ka jingïadei kaba ïajan bad ki paidbah, hynrei katei ka jingai jingmut ka jong ki ïa u, ka dei kumno ba un lah ban pynbha bad ïajan bad ki paidbah ha ka rukom treikam, ym ban pynduh tiket ïa u.
Kitei ki nongïalam ki kynnoh pynban ba kane ka jingmih syndet ka jong u Bah Victor Rani na ka seng, ka dei pynban ka jingthmu sniew ka jong u, namar ka jingmih syndet ka jong u ka la buh jingeh shikatdei ïa ki kum ki nongïalam ka seng ban wad ïa u kyrtong ba thymmai ban ïakhun ha kane ka ilekshon MDC ka ban sa long ha u snem 2025 na ka Jirang konstitwensi naba ka por ruh ka la thmit.
Shuh shuh, kitei ki nongïalam ki la pynshai ruh ba ki jingkynthoh jong u Bah Victor Rani ha ka jingkren jong u hynnin ka sngi, ka dei tang ka jingpynbiej paidbah naba na ka liang jong ka seng, naduh u Bah Prestone Tynsong, State President ka NPP, ki la ïaleh ban khot ïakren ïa u Bah Victor Rani, hynrei u la kyntait ban leit ïakren wat hadien bunsien ba ki la kyrpad ïa u naba u la don lypa ïa ka jingmut ban rung sha ka seng Congress.
Kumba ka long mynta hadien ka jingmih noh jong u Bah Victor Rani, ki la mih lai ngut ki samla rangbah na katei ka thaiñ ban pan ïa ka tiket MDC na Jirang konstitwensi ban ïakhun na ka NPP, kiba kynthup ïa u Bah Albertus Lapang, u Bah Kitboklang Khongiong bad u Bah Balawan Syiemiong bad don ruh ki nongïalam kiba la ai jingmut ban ïakhun hi u Bah Sosthenes Sohtun uba dei mynta kum u MLA, hynrei na ka liang ka seng, kam pat la shim ïa ka rai ïano ban ai tiket bad kin dang shong pyrkhat bha ha kine ki sngi ban sa wan bad ruh ban twad jingmut shwa na ki paidbah.