
Nongpoh, Nohprah 12
U kyrtong MDC jong ka Congress na Mawhati konstitwensi, Bah Dominic Mynsong, u la pynpaw ïa ka jingkyrmen bad sngew skhem ban ïoh ïa ka jingjop ha ka ilekshon MDC ka ban sa long ha u snem 2025 wat lada u Bah Charles Marngar, MLA ka thaiñ uba la jop na ka Congress u la mih ban leit pynïasoh noh sha ka NPP ha ki khyndiat bnai ba la dep.
U Bah Dominic Mynsong u la pynpaw ïa kane haba kren ha ka jingïalang paidbah ha ka sngi Palei ha ka shnong Jatah ha kaba ki nongïalam jong ka Ri Bhoi District Congress Committee (RBDCC) hapoh ka jingïalam jong u Bah MG Kharshanlor, ki la leit ban pynskhem ïa ka jingïoh tiket jong u ban long kum u kyrtong MDC ka seng na Mawhati konstitwensi.
Ki nongïalam kiba kren ha kane ka sngi haba ai jingkren, ki la ong ba ki paidbah ka Mawhati konstitwensi ki dei kiba ieid ïa ka seng Congress ha kaba ki la pynjop donburom ïa u kyrtong jong ka seng (Bah Charles Marngar) ha baroh ar tylli ilekshon (MLA bad MDC) ha ki snem ba la dep bad kyrmen skhem ba ha kane ka kynti ruh, ki paidbah kin sa ai ka jubab kaba biang pyrshah ïa u Bah Charles Marngar uba la phet na ka seng.
Kitei ki nongïalam ki la ong ruh ba wat lada bun ki MLA bad MDC ki la mih noh na ka seng, hynrei na ka liang ka jong ki lem bad ki paidbah, kin ïai neh skhem beit ha ka seng Congress bad pynpaw ruh ba ka seng wat lada khlem ki MLA ne MDC ruh kan dang khlaiñ bad kan ïoh biang ïa ka jingjop donburom ha kane ka ilekshon MDC ka ban sa wan.