Lah ban ïakhun u Bah Martle na ka UDP hadien ba ieh noh ïa ka kam President ka HSPDP EKH

U la ong ba ka jingieh ka jong u ïa ka kam President ka long ban plie lad ïa ki nongïalam ka seng ban thung da kiwei pat ban pyntyllun ïa ki kam jong ka...

Shillong, Nohprah 12

U MDC ka Hill State People’s Democratic Party (HSPDP) na Mawkynrew, Bah Martle N Mukhim ha ki khyndiat taïew ba la dep u la aiti ïa ka shithi iehnoh kam kum u President ka HSPDP East Khasi Hills, bad katkum ka khubor ba la ïakren sharum-shaneng la ïathuh ba u lah ban ïakhun noh ïa ka ilekshon MDC ban wan na ka seng United Democratic Party (UDP).

Haba ïakren bad u Bah Mukhim, u la ong ba ka jingiehnoh ïa ka kam President jong ka HSPDP ka dei namar ba um don ha ka met kaba khlaiñ, hynrei u dang dei hi u dkhot jong ka HSPDP. U la ong ba u sngew biej ban shu bat sah ïa ka kam khlem da lah ban trei.

“Ha kine ki bnai nga don ha ka met ba pang bad ngam lah ban trei ban ktah ban pyntyllun ïa ka kam jong ka seng. Nga sngew biej ban shu bat sah ïa ka kam khlem lah trei, khamtam ha kane ka por ba ka ilekshon ka la jan”, u la ong.

U la ong ba ka jingieh ka jong u ïa ka kam President ka long ban plie lad ïa ki nongïalam ka seng ban thung da kiwei pat ban pyntyllun ïa ki kam jong ka seng hapoh ka district.

Haba kylli halor ka jingmih ka khubor ba u la ïakren bad ki nongïalam ka UDP ban ïakhun ïa ka ilekshon, u Bah Mukhim u la kyntait ïa kane ka khubor da kaba ong ba ka jingïakren bad ka seng UDP ka long lynter tait.

“Ka jingïakren jong nga bad ka UDP te ka don lynter tait, kata hapdeng ka HSPDP bad ka UDP ha ka kyrteng jong ka RDA, ym dei ba nga ïakren tang mynta”, u la ong.

U Bah Martle Mukhim u la mihkhmat ruh kum u MLA haduh saw sien ïa ka Dienglieng konstitwensi kaba la tip mynta da ka Mawkynrew konstitwensi.

Haba kylli la un ïakhun biang ïa ka ilekshon MDC na ka seng HSPDP, u la ong ba kane ka dang don ka jingïakren lada ka met ka shah un ïaid shakhmat.

“Barabor nga ieh ha ka jingïarai lang jong kiba bun ki nongkyrshan bad nongtrei jong nga, kaba bun hi ka dei ka rai jong ki”, la ong u Bah Mukhim uba dei uwei na ki ‘riew saiñpyrthei ba la rim bha ka Jylla.