Shillong, Nohprah 12
U nongrwai ba pawnam ka pyrthei, u Bryan Adam u la leit jngoh ïa ka ‘law kyntang kaba don ha Mawphlang bad ïa ka Elephant Falls kaba don ha Upper Shillong ha ka 11 tarik mynta u bnai ha shwa ba un mih noh na Shillong ban leit rwai sa ha nongbah Delhi.
U Bryan Adam u la wan poi sha Shillong ha ka janmiet jong ka 9 tarik mynta u bnai bad sah ha hotel Courtyard kaba don ha Khyndailad ban leit rwai pat ha madan JN Stadium ha ka 10 tarik jong u juh bnai. Ha kane ka sngi palat phew hajar ngut ki paidbah ki la wan sakhi ryngkat ka shongshit haba ki la ïohsngew markhmat ïa ki jingrwai jong une nongrwai ba la 65 snem ka rta na Canada.
Une u nongrwai hadien ba u la dep wan jngoh ïa kitei ar tylli ki jaka jngohkai pyrthei kiba itynnad ha Shillong u la thep ruh ha ka ‘Instagram’ lade kaba ai kyrteng Bryan Adam kaba don 6.2 million nongbud kaba la poi palat shi lak khatlai ngut kiba peit hapoh ka 8 kynta.
Ki kyntien ba u Bryan Adam u la thoh ha ‘Instagram’ lade, ki long “Shillong was incredible, biggest concert there ever, spent the next day trying to see sites like the sacred forest, waterfalls and what seemed like a lot of driving, then off to Delhi. We passed mount Everest on the way.”
Nalor kitei ki kyntien, ha ka dur-khih u la pyni ruh ïa ka ‘law kyntang, ka kshaid ha elephant falls, ka Khyndailad bad ïa u lum makashang haba u leit phai sha Delhi.
U Bryan u la leit sha Mawphlang ha ka por 11:00 baje mynstep ryngkat ki bor pahara shwa ba un mih na Shillong. Hynrei la ïoh jingtip ba ki don napdeng ‘riew paidbah kiba la wan kai ha katei ka jaka kiba la ïaknieh shondur tangba ki bor pahara kim shah ban shondur slem bad u (Bryan Adam) namar u hap ban leit noh sha Delhi ban rwai pat ha ka 12 tarik Nohprah bad kiwei nongbah ka ri India.
La ïohi ba u Bryan Adam u la shondur hakhmat bad hapoh ka ‘law kyntang.
Haba u nongthoh khubor u la wad jingtip ïa kane, u la ïoh ban ïakren bad uwei u nongbatai uba ap ïa ka ‘law kyntang lyngba ka phone uba la ai jingtip ïa u Bryan Adam shaphang kane ka ‘law kyntang haba u rung shapoh ka khlaw.
Ha kawei ka khubor, ki paidbah kiba ïaid ba ïeng bad kiba shong hapoh kali kim shym la poi pyrkhat ba u briew uba lieh phuiñ-phuiñ un hiar na kali kaba la ai kyrpang ban leit shong hapoh Gypsy bad ki pulit pahara ha ka por ba ka Khyndailad ka dang jur ka dheng kali.
Kane ka la jia ha ka step jong ka 10 tarik mynta u bnai haba u Bryan Adam uba dei u nongrwai uba pawnam ha ka pyrthei u la mih na jaka sah ha Courtyard ha ka por 9:30 mynstep ban leit peit ïa ka rynsan rwai ha JN Stadium kaba don ha Polo hynrei mar shu poi ha pyrshah ka State Bank of India bad Apex Bank, u la hiar na kali ba u shong ban leit shong pat bad ki pulit pahara.
Katkum ka durkhih ba la saphriang, la ïohi ba u Bryan Adam uba deng ïitkhmat ïong bad phong sopti lieh u la kiew beit ha ka Gypsy ryngkat ki pulit pahara kaba la pynkmen ruh shi bynta ïa ki pulit ban ïoh shondur lang bad u.
Ki khubor ki ïathuh ba ka jingïohlad u Bryan Adam ban leit shong bad ki pulit pahara ka dei ha ka por ba dang dheng kali bad ha kane ka por ki paidbah ki la ang lyngngoh ban ïohi ïa u phareng uba leit shong beit-beit ha Gypsy namar kim tip ba un dei u Bryan Adam.
Ki khubor ki ïathuh ba u Bryan Adam u la leit peit bniah ïa ka rynsan, ki tiar pynsawa ha JN Stadium ha ka step jong ka 10 tarik mynta u bnai khnang ban sngewtynnad haba ai jingrwai sha ki paidbah kiba wan sngap bad hadien ba u la dep peit bniah u la leit phai biang sha jaka sah.
Ki khubor ki ïathuh ba u Bryan Adam u la mih na jaka sah ha ka por 7:00 baje janmiet bad poi sha JN Stadium ha ka por 7:30 janmiet bad mar shu dap 8:00 baje janmiet u la kiew beit-beit sha rynsan bad ki paralok ban ai jingrwai khlem da ai jingkren shuh ïa ki paidbah haduh ba ki paidbah ki la shongshit.
Ki khubor ki ïathuh ba mar shu dep rwai ha ka por 10:30 mynmiet u Bryan Adam u khlem shong slem bad u la rung beit ha ka kali ban leit phai sha jaka sah khnang ban ym pynthut ïa ka ïaid ka ïeng ynda ki paidbah ki la mih na madan.
