
Shillong, Nohprah 12
Ka Khasi Students’ Union (KSU) ka la dawa na ka Sorkar Jylla ban pynsangeh noh ïa ka jingpynkylla ha ka Meghalaya State Investment Promotion & Facilitation Act, 2024, ban aibor ïa ka Investment Meghalaya Agency (IMA) ba kan thied bad ai jaka sha ki nongseng kam namar ka long pyrshah ïa ka jingthmu jong ka Meghalaya Land Transfer Act.
Haba kren sha ki lad pathai khubor ha ka sngi Palei, u General Secretary ka KSU, Bah Donald V Thabah u la ong ka seng ka kwah ban phah ïa ka khubor kaba shai sha ka Sorkar Jylla ba ka dei ban kren shai halor kane, bad kumno kan pynmyntoi ïa ki nongshong shnong ka Jylla, bad lada ka Sorkar kam lah ban leh ïa kata kan hap ban pynsangeh ïa kane ka Act.
U la ong ba ka Sorkar Meghalaya ka la pynkylla ïa ka Meghalaya State Investment Promotion and Facilitation Act 2024, kaba aibor ïa ka Investment Meghalaya Agency (IMA) ban thied jaka bad ai jaka sha ki nong seng kam seng jam lane ki kompani, ka bym shym la shai satia la ki dei kiba nabar Jylla lane kiba napoh kane ka Jylla.
“Kaei kaba ngi sngewthuh hangne ka long ba kum kane ka jingpynkylla kam long satia kaba ïaid kat kum ka Meghalaya Land Transfer Act”, la ong u Nongïalam KSU.
U la ong ruh ba ka Meghalaya Land Transfer Act ka don ban ïada ïa ka hok ki paid ‘riewlum ka Jylla halor ka khyndew ka shyiap. Hynrei haba ïadei bad kane ka Act, ka IMA kan thied ïa ka jaka bad kan aiti sha ki nongseng kam shimet khlem ka jingïasyllok bad ki Dorbar Shnong ne ka KHADC, JHADC bad GHADC haba ka Jylla ka hap hapoh ka Sixth Schedule.
U Bah Donald u la ong ba ka KSU ka sngew ba kum kane ka jingpynkylla ïa ka Aiñ (Amendment) kan ktah ïa ka bha ka miat jong ki paid ‘riewlum ka Jylla bad kane kan lam ruh sha ka jingknieh ïa ki jaka puta jong ki paid ‘riewlum.
“Ngi lah ban ïohi haba phi pynmih ïa ka ktien ‘Nongkynshew’, kim shym la pynshai lane kren shai la kine ki nongkynshew ki dei ki paid ‘riewlum ka Jylla ne kin dei ki kompani shimet na shabar ka Jylla. Mynta, lada ki kompani shimet ki wan na shabar ka Jylla bad sdang kynshew kam ha ka Jylla jong ngi, mano ban ïohnong na kata?”, u la ong.
Shuh shuh na ka liang u Nongïalam ka KSU u la ong ba ka Jylla Meghalaya kam don satia ïa ka polisi ban pynthikna ba ki samla trai Jylla ba khlem kam khlem jam kin ïoh kam ha kine ki kompani shimet, da kaba kdew ruh ba kiwei ki Jylla kum ka Haryana, Andhra Pradesh, Maharashtra bad Jharkhand, ki la don ïa ki polisi ba kino-kino ki kompani shimet kiba kynshew kam ha kine ki Jylla kin hap ban pynthikna ba 75 percent na ki kam dei ban bhah sha ki trai muluk.