
Shillong, Nohprah 12
Hadien ka jingpynbna jong u MDC ka Mawlai, Bah Teiborlang Pathaw ba u artatien ban ïakhun ïa ka ilekshon MDC ka ban sa long shen, ki nongkyrshan bad ki nongïalam jong ka National People’s Party (NPP) ha Mawlai, ki la pynsawa da kawei ka sur ba kin ym ailad satia ba u Bah Teibor Pathaw un shongthait noh na ka jingïakhun ïa ka ilekshon.
Kane ka jingkhih jong ki nongkyrshan u Bah Teibor ka long ruh hadien ba ka NPP ka la pynbna ïa ka thup ki kyrtong ha ka kylla ba nyngkong, ha kaba ka kyrteng jong u Bah Teibor kam shym la paw satia.
Haba kylli, u Working President ka NPP, Bah Hamletson Dohling u la ïathuh ba ka jingpynsahteng ban rai ïa u kyrtong na Mawlai konstitwensi ka dei namar ki don kumba lai ngut kiba la pan tiket, ïa kiba ka seng ka dang bishar bad kan sa pynbna ha ka thup kyrteng ba ar.
Lah ban kdew ba ha ki khyndiat bnai ba la dep, u Bah Teibor Pathaw u la pynpaw sha ki lad pathai khubor ïa ka jingartatien ban ïakhun biang ïa ka ilekshon MDC, da kaba pynpaw ruh ba lehse ki paidbah kim patiaw bad kim donkam ïa ki kam ba u la leh ban kyntiew ïa ka Mawlai konstitwensi.
“Ki paidbah nongkyrshan ki la wan ïakynduh ïa ngi ban ong ba kin trei borbah ma ki hi na bynta jong u Bah Teibor lada u mih ban aireng biang ha kane ka ilekshon. Kane ka dei ka sien kaba nyngkong ba ngin ïohi bad ïohsngew ba ki paidbah dalade hi ki la sngewthuh ïa ka jingkordor bad ki kam ba bha kiba u MDC u la trei baroh shi katta”, la ong u Bah M Lyngdoh.
U la ïathuh ba ha ka jingïakynduh bad kiba bun ki nongïalam ka NPP ruh ki la pynpaw ïa kajuh ka rai, ba kim kwah ba u Bah Teibor un shong noh namar ki ïohi ba u dei u briew uba thrang ban trei ban kyntiew ïa ka Mawlai ha ki liang baroh.
“Kham ñiar ban shem ïa u nongmihkhmat uba kloi ban plie lad plie lynti ïa ki khun samla uba don lang ryngkat-ryngkat ha ka khia ka shon, bad u bym klet ïa kiba ngat ha ki jingdonkam ba kyrkieh,” la ong shuh shuh u Bah Lyngdoh.