Shah thombor ka kali jong ka Dr. Ampareen katba dang thmu leit phai ïing

Halor kane ka jingjia na ka liang ka Dr. Ampareen ha ka sngi Palei ka la leit ban ujor da ka ejahar ha thanat Laitumkhrah ban pyntip ïa kane ka jingjia.

Shillong, Nohprah 12

Ha ka janmiet jong ka 10 tarik mynta u Nohprah ka kali Sorkar ba la pyndonkam da ka Myntri kaba dei ka MLA na East Shillong, Dr. M Ampareen Lyngdoh, ka la shah thombor ha ki briew bym lah ban ithuh katba ka dang thmu ban leit phai sha la ïing ryngkat bad ki bahaïing.

Kane ka kali kaba don ïa u nombar ML01 – 0011 ka la shah thombor hajan ka Greenhill Restaurant ha lynti ban leit sha Saw Furlong, Shillong, hynrei donbok ba ha kane ka jingjia kam shym la don kano-kano ka jingmynsaw, namar ha katei ka por ym shym la don kiba shong sha ka bynta ba shakhmat lait noh u nongñiah.

Kane ka jingjia ka la pynkyndit ïa baroh khamtam ïa kiba shong ha katei ka kali kiba la sheptieng bad rit mynsiem, namar ka ïit jong ka bynta ba shakhmat ka kali ka la pait bad hap lut sha madan. La suba ba ka jingpait jong ka ïit kali ka dei namar ka jingshah kawang da ki kynja tiar eh bad khia.

Halor kane ka jingjia na ka liang ka Dr. Ampareen ha ka sngi Palei ka la leit ban ujor da ka ejahar ha thanat Laitumkhrah ban pyntip ïa kane ka jingjia.

Katkum ka khubor ba la ïoh lum ka ïathuh ba kane ka jingjia ka la pynkyndit bad pynsheptieng ïa baroh ki bahaïing bahasem, kaba dei ruh ka daw ba slem ban leit ujor sha ki pulit.

Na ka liang ki bahaïing ka Myntri haduh mynta ki dang sah ha ka umdum namar kim pat lah ban pynthikna la kane ka jingthombor ka dei kaba da thmu khnang ne kaba shu jia ryngkhat.