Ha ki jaka kiba eh bha ha thaiñ Lumparing, sa ar tylli ki surok kali pynurlong u MLA

U Bah Sanbor u la ïathuh ba ka jingmang pisa ïa kine ar tylli ki surok ha ka thaiñ Lumparing ka la kot sha ka T. 3,58,31,500

Shillong, Nohprah 13

U MLA ka South Shillong konstitwensi, Bah Sanbor Shullai uba la lah ban pynurlong ïa ka surok ha Lumparing kaba khlem poi pyrkhat shuh ba kan urlong, mynta sa ar tylli ki jaka kiba eh bha ha ka thaiñ Lumparing kin ïoh surok noh lyngba ka jingtrei borbah jong une u MLA.

Ka jingshna ïa kine ki surok kaba siang da ka dewbilat ka dang ïaid shaid-shaid, bad ha ka Sngi Thohdieng, u Bah Sanbor ryngkat ki karikor ka PWD u la leit ban khmih ïa kine jaka kiba dang shna surok kaba ki nongshong shnong ki khlem poi pyrkhat shuh ban ïoh surok namar ki jaka ki long kiba sharing bad riat.

U Bah Sanbor u la leit ban khmih hi dalade ïa kine ki jaka kiba kham saja ban shna surok namar ka jinglong riat jong ka jaka bad ka jingdon jong ka wahduid.

U Bah Sanbor u la ïathuh ba ka jingmang pisa ïa kine ar tylli ki surok ha ka thaiñ Lumparing ka la kot sha ka T. 3,58,31,500

Une u MLA u la ai ka jingïaroh ïa ki karikor ka PWD bad ïa u Symbud Myntri Rangbah, Bah Prestone Tynsong kiba la trei shitom lang ban pynurlong khamtam ban mynjur bad mang pisa.

Namar kata, u Bah Sanbor u la ong ba u kyrmen ba ïa kine ar tylli ki surok yn sa lah ban pyndep noh ha kine ki khyndiat bnai bad la kumno-kumno yn sa ïoh ban plie noh ha u Jymmang 2025 khnang ba ki paidbah kin ïoh ban pyndonkam bad kan long shisha ka jingkyrkhu ïa ki nongshong shnong.