Shillong, Nohprah 13
U Bah John Robert Khongjee ba shong ba sah ha Mawlai-Mawïongrim bad uba la shah tuh ne shah ‘hack’ ka ‘WhatsApp’ ha uwei u briew uba la kam ïalade ba u dei u Pastor, mynta u la ïoh biang ïa ka ‘WhatsApp’ la jong hadien ba u la leit ban ujor hapoh ka Cyber Crime ha ka 10 tarik u Nohprah, 2024. Ka ‘WhatsApp’ jong u ka la long biang hadien ka 24 kynta kata ha ka 11 tarik u Nohprah, 2024.
Kum ban shu pynkynmaw hangne ba ha ka 7 tarik u Nohprah, 2024, u briew uba ‘hack’ ïa ka ‘WhatsApp’ jong u Bah Khongjee bad uba la kam ïalade ba u dei u Pastor, u la dawa pisa na ki ar ngut paralok kiba don hapoh ka ‘WhatsApp’ jong u ha kaba u Bah Khongjee u la pyni lyngba ki jingthoh ne ki ‘message’ ba une u briew u la ai ruh da ki ‘bank account’ ban pynbiej bad phah pisa na kitei ar ngut paralok.
Na ka liang ki paralok jong u Bah Khongjee kiba la shah pynbiej ban phah pisa, ki la pynpaw ïa ka jinglyngngoh halor kane ka jingpan pisa lyngba ka ‘WhatsApp’ hynrei na ka liang u Bah Khongjee u la pyntip sha kito ki bym pat tip ba kim dei ban phah pisa lane ban ngeit ïa kane jingdawa namar kane ka ‘WhatsApp’ ka dei kaba la shah ‘hack’ bad ba la pyndonkam da uwei u briew u ba la kam ïalade ba u dei u Pastor.
U Bah Khongjee u la pynpaw ba u dap da ka jingkmen ba ka ‘WhatsApp’ jong u ka la long biang mynta bad ai mynsiem lem ruh ïa kiwei pat kiba shem ïa kum kine ki jingjia ba kim dei ban sheptieng ne sngewlehraiñ hynrei ki dei ban mih beit shakhmat ban ujor sha ki pulit bad ki dei ban ïathuh sha ki lad pathai khubor khnang ba kin lah ban pyntip paidbah bad kiwei pat kin ym ngat ha kum kine ki juh ki jingjia.
“Ngim dei ban sheptieng lane ban sngewlehraiñ haba ngi shah thok hano-hano hynrei ngi dei ban mih beit shakhmat ha ka ban leit ujor ïa ka ejahar sha ki pulit bad ban leit ruh sha ki lad pathai khubor ban ïathuh khnang ba kan long ka jingpyntip paidbah ba kiwei pat ki paralok jong ngi kin nym ngat ha kum kane ka apot”, ong u Bah Khongjee.
