Jan shah beh shnong ki 2 longïing ba kynnoh men-ai-ksuid

Ha katei ka jingjia, la ai por 3 sngi ïa kitei ki longïing ban mih noh na katei ka shnong.

Tura, Nohprah 13

Ka jingbym lah shuh jong ka kynhun pulit ban pynbeit ïa kawei ka jingjia ha kaba ar tylli ki longïing ki la jan shah beh shnong, ha kaba kut ka la pynlong ïa ka kynhun Majistor ban tuklar halor katei ka jingjia da kaba leit hiar sha ka shnong Chirakawa. 

Katei ka shnong ka hap hapoh thanat Rajabala ha West Garo Hills (WGH).

Katkum ki jingtip ba la ïoh lum da ki pulit ka distrik, u Nokma ryngkat ki nongshong shnong ka Chirakawa ki la byrngem ban beh shnong ïa ar tylli ki longïing halor ki jingkynnoh men-ai-ksuid. Ïa katei ka kaiphod la ïoh pdiang ha ka 12 tarik mynta u bnai.

Ha katei ka jingjia, la ai por 3 sngi ïa kitei ki longïing ban mih noh na katei ka shnong.

Hadien ba la ïoh jingtip, ka kynhun pulit ka la poi sha katei ka shnong bad pyrshang ban pynbeit ïa katei ka kam bad ki nongshong shnong lem bad u Nokma uba la don lang. Hynrei ki nongshong shnong kim shym la treh ban kynran dien ne khih na katei ka jaka – kaba la pynlong ïa ki pulit ban shong bad ki bahaïing jong u Prokash Sangma bad July N. Sangma ban ai jingïada.

Ha ka step Sngi Thohdieng, ka kynhun hapoh ka jingïalam u Majistor ka la shong ïakren biang sa shisien bad ki nongshong shnong bad khatduh la lah ban pynbeit ïa katei ka kam ha ryngkat ka jingbun kyndon ba kitei ki ar longïing kim dei ban don bynta shuh ha ka kam men-ai-ksuid hadien-habud.

Ha kawei pat ka jingjia, ar ngut ki briew ki la ïap katba 2 ngut kiwei pat ki la mynsaw jur hadien ba ki la ïakynduh ïa ka kynhun ki hati khlaw hapoh ka jaka kaba hap hapoh Gambegre Outpost.

Kine ar ngut kiba la khlad la tip kyrteng kum u Ajit Sangma (62 snem na Dangsapara, Dopgre) bad u Walmi Ch Marak (55 snem na Dangsapara).

Katkum ki khubor ba la ïoh lum, la ïathuh ba ki don ar kynhun ki hati khlaw kiba la ïaid ha katei ka thaiñ ha ryngkat ka jingpeitngor na ka tnad khlaw. Kane ka jingjia ka la jia ha ka 12 tarik mynta u bnai.

Shuh shuh sa ha kawei pat ka jingjia, ki pulit ka Rongram Outpost hapoh WGH, ki la kem ïa uwei u briew ba la tip kyrteng kum u Togan Sangma uba donkti ha ka kam lute hajan Rongsak, East Garo Hills (EGH).

Katei ka jingshah lute ka la jia dang shen bad la kem ïa u hynnin ka sngi, ka 12 tarik u Nohprah. Hadien kane, la aiti noh ïa u sha ki pulit ka EGH ban leh ïa kaba donkam.