
Shillong, Nohprah 13
Ka Dorbar Shnong Golflink ka la pynpaw ïa ka jingbitar halor ka jingpynïeng ïa ki païa bad ka jingsiang ïa ki jar nar ha Polo kaba don hajan ka CRPF Camp khlem kano-kano ka jingpyntip sha ka shnong.
Halor kane ka bynta, na ka liang u Rangbah Shnong ka Golflink, Bah Michel Hek, u la pynpaw ïa ka jingbitar kaba khraw halor ka jingleh stad jong ka Smart City ban thung ïa ki païa bad siang ïa ka jar nar bad ong ba na ka liang ka shnong kam lah satia ban pdiang halor kane namar ha ka jingshisha ki la dei ban wan pyntip shwa sha ka shnong shwa ban jam shakhmat ha ka kam.
“Ka jingleh jong ka Smart City ha ka ban siang ïa kane ka jar bad pynïeng ïa kine ki païa, ka la long kaei-kaei kaba ym lah ban pdiang namar ha ka jingshisha haba ki leh ïa kano-kano ka kam, na ka liang ka Smart City ka dei ban pyntip bad kynjoh ktien shwa sha ka shnong khnang ba ngin ïatrei ryngkat lang”, ong u Bah Hek.
U Bah Michel Hek u la ong na ka liang ka Smart City ka dei ban pynpra mardor ïa kane ka jingtei bad ka jingsiang ïa ki nar hapoh ka shitaïew bad lada kim leh eiei halor kane, na ka liang ka shnong kan sa pynpra hi noh.
“Ngin aipor shitaïew ïa ka Smart City bad lada kam pynsangeh hapoh ka shitaïew, na ka liang ka shnong ngin sa pynpra beit ïa kane bad kane ka dei ka jingmaham kaba tyngeh”, ong u Bah Hek.
U la ong ba ka jingsiang ïa ki nar bad jingthung ïa ki païa ha katei ka jaka ka la pyndap um ha ki nala bad kaba la ktah pat sha ki jaka sah kiba don kham shaneng. Nangta u la ïathuh ruh ba ka Tnat PWD ka la dep ban mang pisa ha ka ban tap sleb ïa kane ka jaka khnang ban ailad ïa kiba shong die jingdie ban shong ha kine ki jaka.
Shuh-shuh, u Bah Hek u la ïathuh ruh ba na ka liang ka Tnat PWD ka la dep ban pynïoh skhim haduh T. 6 klur tam kumjuh ruh na ka liang u MLA ka thaiñ u la dep ban pynïoh skhim sa kumba T. 2 klur ha ka ban tap sleb ïa katei ka jaka bad ban pynitynnad ïa ka shnong Polo.
U la ong ruh ba ka jingwan trei ha kane ka jaka ka la ju long tang ha ka por mynmiet la kum ki nongtuh ne ki mynnong jongno-re-jongno. Namar kata, na ka liang ka shnong ka buh ïa ka jingmaham kaba tyngeh ïa ki kontraktor kiba pyntrei ïa katei ka jaka ba lada ki wan trei ha ka por mynmiet bad lada jia eiei hadien-habud, ka shnong kan ym shim satia ïa kano-kano ka jingkitkhlieh.
U Bah Hek u la ong ba kum ka shnong kam khang ïa ki kam pynroi hapoh ka shnong hynrei ki dei ban ïaid katkum ka lynti kaba dei bad ong ba kum kine ki kam pynroi kiba shu wan trei khlem ïaid lyngba ka shnong, ka shnong da lei-lei kan ym lah satia ban pdiang.